Sunday, 18 March 2007

هلاوس بترولية


وانا قاعد كدة قعدة حلوة ساعة عصاري تخيلت حاجة كدة نقدر نقول عليها هلوسة بس قلت اتخيل كدة واشوف الدنيا دي هيكون شكلها ايه ساعتها:
تخيلت ان البترول خلص من الدول الخليجية والعراق وصحيوا الصبح من النوم يضخوا بترول مالقيوش لتر واحد حتى في الارض........تفتكروا ايه اللي ممكن يحصل ساعتها طبعا بصرف النظر عن النتائج الاقتصادية والدولار والين والكلام الكبير اللي ما بفهموش دة:
اولا:امريكا هتقرر انها تنسحب فورا من العراق دون قيد او شرط وهتقول لهم جتكم نيلة بلد فقري انا عارف ايه اللي كان خبطني في نافوخي واحتليتكم من اساسه.
لا وكمان قبل ماتمشي هتسيب لهم منحة كدة للناس اللي لسة عايشين في العراق كل واحد بتاع 50 دولار كدة يمشي نفسه بيه على ما تفرج.
ثانيا:السعودية بقى هتقول ان لا اكيد الموضوع دة فيه حاجة غلط مش ممكن انتوا قلتوا لنا قبل كدة ان احنا عندنا احتياطي طب راح فين؟!!!!!طيب هنعمل ايه في جيش الموظفين اللي عندنا والعمالة الاسيوية دي هنصرف عليها منين؟
معقول ولادنا هيشتغلوا؟لا مش ممكن دة كابوس؟ معقولة بناتنا هيضطروا ينزلوا من بيوتهن ويشتغلوا زي بقية خلق ربنا .....لا لالا مش معقوووووول
طيب هنطلع عقدنا النفسية على مين؟ممكن نتأمر على مين ؟طيب الدور السعودي في المنطقة بعد ما صدقنا انه ابتدى يبان وابتدينا نسمع اسم السعودية في نشرات الاخبار.......هنعمل ايييييييييييييه؟
ثالثا:العمالة الاسيوية قررت بقى ترحل فورا بس بعد حملة تخريبية وتدميرية واسعة انتقاما من اللي شافوه واللي شافه قبلهم اهلهم في البلد دي من ظلم وافترا وفساد واكل للحقووق
وكل واحد منهم قرر يقتل كفيله قبل ما يمشي وقبل ما يقتله قرر يعذبه عذاب اشد من عذاب الاخرة
رابعا: كل الدول العربية الغير خليجية والاسيوية قررت رفع قضايا على دول الخليج لصرف مستحقات العمالة بتاعتها المتأخرة على الدول دي ومش بس كدة لا دة ابتدوا يحققوا في كل جرايم الاغتصاب والتعذيب اللي ياما حصلت منذ الثورة البترولية في السبعينات ولحد دلوقتي
خامسا: النايل سات قنواته قلت للربع تقريبا بعد ما جميع قنوات الاغاني الخليجية بالاضافة لقنوات الدجل والشعوذة وقراية البخت اللي بيمتلكها خليجيين وكل قنوات روتانا والايه ار تي مافضلش الا قنوات المصريين واللبنانيين بس
سادسا:كل الاجانب المحترفين اللي كانوا بييجوا الخليج علشان السبوبة اللي فيه روحوا فورا وقالوا لهم نشوفكم امس
مش بس كدة دة قبل ما يمشوا لبلادهم قدموا شكاوي للفيفا ضد اندية الخليج اللي مش عارفة تسدد لهم مستحقاتهم وقالوا لهم لما انتوا مابتعرفوش تتنيلوا تلعبوا كورة....كنتم بتجيبونا ليه
سابعا:المواطنون الخليجيين الاشاوس لما البترول خلص بقى قرروا يبيعوا سياراتهم الفارهة ما طبعا مفيش فلوس تغطي البنزين بتاعها فباعوا عربياتهم للاجانب قبل ما يمشوا وطبعا برخص التراب واشتروا كلهم عجل (دراجات) وتكاتك (مفرد تك تك) وياسلام بقى ع الشاب الخليجي وهو ضارب الجلابية وراكب العجلة بتاعته
ثامنا:الكويت بعتت لامريكا استغاثة انها خايفة من العراقيين لواحد منهم يعمل زي صدام زمان كدة امريكا ردت عليهم قالت لهم واحنا مالنا انشا الله تولعوا في بعض انتوا الاتنين احنا مالنا
تاسعا: نشرات الاخبار والجرايد بتحذر من تدفق الاجئين الخليجيين على مصر بحثا عن عمل وانتشار الخليجيين في الشوارع المصرية والحدائق العامة (بعد ما كانوا منتشرين في فنادق الخمس تجوم وكازينوهات شارع الهرم)وقوات الامن المركزي المصرية تتدخل لفض اعتصامهم من الحدائق العامة تمهيدا لترحيلهم كلاجئين الى دول اخرى
عاشرا: فندق موفنبيك يقوم بطرد احد الامراء السعوديين واهله واصدقاؤه بعد ان احتلوا غرف الفندق واجنحته لسنوات طويلة بدون دفع الحساب وتهدد باحالته الى النيابة مالم يقم بدفع المستحقات وهو يرد: اجيب منييييين؟ ايش ياخد الريح من البلاط؟ خدوا كلابي بس سيبوني
تخيلاااااااااااااااااااااااااااااااااااااااااااااااااااااااااات وهلاوس رهيبة تخيلوا معايا انها حصلت فعلا تفتكروا هنضحك ولا نعيط
هنضحك على ناس الفلوس اصابتهم بالعمى والصمم وفقدان الحكمة والقدرة على التفكير ودة هيكون جزاؤهم.....ولا هنعيط على حالنا كعرب ومسلمين كنا بؤساء وزدنا بؤس على بؤسنا.
تخيلوا معايا كمان ايه اللي ممكن يحصل وخلونا نضحك ونعيط مع بعض
المهم ان انا صحيت من احلامي دي على جريدة واول عيني ما وقعت عليها قريت:
الاستغناء عن الالاف العمال المصريين في دول الخليج
خادمة اندونيسية تلجأ لسفارتها هربا من تعذيب الكفيل لها
امير عربي يحطم احد الفنادق في مصر
قلت:
كفااااااااااااااااااااااااااااااااااااااااااااية
يارب عفوك ورضاك

3 comments:

  1. شوف يا عزيزي اللي بتقول عليه ده بيحصل ما انكرش
    بس انزل حضرتك كده للسوبر ماركت وقلب في الصابون والشامبوهات والبسكوت والعصاير وحاجات تانية كتير هتلاقي في منها كتير اوي صنع السعودية .. تعرف حضرتك ان الميزان التجاري المصري السعودي لصالح السعودية!!!؟؟
    اللي بتحكي عليه ده كان زمان وجبر .. راح وراحت ايامه حضرتك مع كرامة البلد ورخص تمن البني الادم .. يا سيدي الكريم يحكي أن السيد رئيس دولتنا الموقر ذهب ذات مرة إلي سلطنة عمان واجتمع بالجالية المصرية ليطمئن مشكورا عليهم فاشتكوا لهم من الكفيل وتأخر الرواتب الخ الخ ونظرا لرقة قلبه قالهم انا عندي في الطيارة اللي جاي فيها اماكن فاضية اللي مش عاجبه يفضها سيرة ويجي معايا ..
    يحكي أن تاني أيام السادات والانفتاح كان نسبة كبيرة من العمالة المصرية الغير شرعية تعمل في اليونان وقبضت عليهم السلطات اليونانية هناك وحطيتهم علي مركب وقررت شحنهم علي مصر .. السادات الله يرحمه تلقي مكالمة هاتفية من السفير المصري بأثينا يبلغه فيها بما حدث فعلي الفور وقبل أن تغادر السفينة الموانئ اليونانية لم كل اليونانين اللي في البلد وحطهم علي طيارة وكلم رئيس اليونان وقاله قبل ما المركب توصل هتكون الطيارة وصلت فما كان من الرئيس اليوناني الا الاعتذار ورد السفينة اليونانية ووفق اواضع العمالة المصرية
    شوفت حضرتك مين بيبعتر أم كرامتنا لاموخزة؟
    انا باعمل في الامارات وبصراحة بتعامل هنا أحسن مليون مرة ما بتعامل في مصر وكذلك الحال لكل من سألتهم
    وعملت فترة في السعودية أيضا واحب اوضح لك اننا اللي بندي الانطباعات السيئة دي والله سمعتها اكتر من مرة بوداني مش معقولة انت مصري
    ليه بقي عشان كنت بحافظ علي كرامتي ومبقبلش الاهانة وبراعي ضميري في شغلي بعيد عن مسح الجوخ والفهلوة اللي بيشتهر بيها معظم المصريين ومع الاسف سوئت سمعتنا جدا لدرجه ان شركات كتير بترفض تشغيل العمالة المصرية كده بالنص
    شعور وسخ اوي لما تروح شركة ويقولك اسف مبشغلش مصريين مش كده؟
    يعني طولت عليك كتير بس حبيت اوضح لك الحقيقة ان الناس اللي كنا بنقول عليهم بهايم زمان دول عدونا بمراحل وعلي فكرة امارة دبي لا تملك بترول وكل اقتصادها ده بيعتمد علي التجارة الحرة وشوف دبي قامت امتي وبورسعيد عندنا قامت امتي وقارن بين الاتنين دلوقتي!! وشوف عدونا بمراحل ولا بخطوتين بس؟
    قد اختلف معك في الرأي ولكن لا يعني هذا اني لست معجبا بمدونتك الجميلة هذه
    تحياتي

    ReplyDelete
  2. اولا الف شكر ليك على رأيك في مدونتي المتواضعة.
    لما تكون مدونتي جميلة...يبقى اكيد مدونتك اكثر من رائعة وتستحق عليهاانك تكون قاسم باشا مش قاسم افندي.
    طبعا انا عارف ومقتنع بكلامك علشان انا جربت الغربة في السعودية قعدت فيها سنتين وما استحملتش اكتر من كدة.
    المصريين في الغربة مش ملايكة بس برضة مش شياطين وكله بيرجع للأصل والتربية.
    هو صحيح التعليم ماخلاش حد مش متعلم وبتلاقي اطباء ولكنهم في سلوكهم.....ولا بلاش علشان ما نغلطش في حد.
    انما ارجع واقول كل اناء ينضح بما فيه وكل واحد سلوكه بيعبر عن بيئته وتربيته.
    بس ادعي ربنا معايا ان الشعب المصري الراقد تحت التراب دة يفوق بقى.

    ReplyDelete
  3. لو خلص البترول من عندهم حايرجعوا العصر الحجري اللي كانوا فية لغاية 35 سنة فاتت وترجع الامور لوضعها الطبيعي

    شوية عرب جرب بدو رٌحل سارحين بشوية معيز في الصحراء

    اول مرة اسمع الحكاية بتاعه اليونانيين اللي قاسم افندي بيحكيها

    بس فعلا قصة تشرف وتحسسك ان كان لينا كرامة
    الله يرحمك يا سادات

    فين الكلام دة من اللي بيحصل دلوقتي للمصريين في كل دول العالم

    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails