Wednesday, 14 March 2007

الشعب المصري المؤدب المسالم الأليف




الشعب المصري دة امره غريب عجيب انا عمري ما شفت شعب بيتعامل بالطريقة دي,عمري ما شفت شعب كل ما ينضرب على قفاه يقول كماااااااااان.
شعب كل افراده او نقول 90%من افراده بيشتكوا مر الشكوى من الحياه والعيشة واللي بيعشوها ومع ذلك ما بيعملش اي حاجة خالص.
فلاحين عايشين في ادنى ظروف ممكنة عايشين عيشة مش ممكن حد في اي مكان في العالم وبظروف مختلفة ممكن يعيشها.
بؤس وشقاء مش طبيعي ناس عايشين على الكفاف وتحت خط الفقر ومع ذلك تلاقيهم عايشين متعايشين مسالمين لا وكمان دول مستمتعين بحياتهم.

كل ما اروح الريف واشوف ان الناس واغلبية القرى في مصر ماتعرفش حاجة اسمها طرق مرصوفة جوة القرى مجرد الطريق الرئيسي في اي قرية اللي ممكن نقول عليه مجازا انه مرصوف انما لسه الشوارع والطرق اللي جوة ماتعرفش يعني ايه رصف ولكم ان تتخيلوا منظر الطرقات دي لما الدنيا تمطر بتتحول القرية من دول لمستنقعات طينية لا تحتمل.
القرى المصرية في معظمها ماتعرفش حاجة اسمها كوب ماء نظيف ونقي بيعتمدوا على مياه صرف صحي في اغلب الاحيان.
معظم الفلاحين المصريين مصابين بامراض لا حصر لها كوكتيل امراض حادة ومزمنة تقدر تقول ان امراض الكلى والكبد في الريف المصري زي نزلات البرد كدة عند شعوب تانية شىء بالنسبه لهم عادي جدا.
ومع ذلك الناس هنا في الريف المصري عايشين ومتعايشين ومسالمين ومؤيدين لحكومتهم اللي بتزيدهم فقرا ومرضا.
نفسي اعرف بامارة ايه مرشحي الحزب الوطني او المنشقين عنه واللي هم حزب وطني برضه بينجحوا في القرى دي؟!!!!!ازاي؟
لا والغريب والمستفز انهم انتخبوا حسني مبارك في الانتخابات الرئاسية اللي فاتت تخيلوا؟
وكأن الشعب المصري دة غاوي فقر وافقار وامراااض وكأنهم لسان حالهم بيقول اديني كمان وكمان او اطلب اكتر اكيد في اكتر
ونسيب الفلاحين في حالهم وممكن نقول معلش اصل عقلهم برضه على قدهم ونروح للعمال
العمال في مصر احوالهم لا تسر عدو ولا حبيب بيشتغلوا من نار في قطاع عام وخاص ولا عائد على الاطلاق ومع ذلك الناس شاكرة وحامدة وراضية باللي ربنا قسمه لهم وبيبوسوا ايديهم وش وضهر وبيقولوا لنفسهم هو حد لاقي شغل واهو ملاليم احسن من القعدة في البيت
طلاب جامعات متكدسين في جامعات حكومية بلا مرافق ولا امكانيات على الاطلاق وبتخرج اجيال في مختلف التخصصات لا يعلموا اي شيء عن تخصصاتهم اللي المفروض يكونوا بيفهموا فيها وتلاقي خريج الطب ما يعرفش القلب ناحية اليمين ولا الشمال وتلاقي خريج الصيدلة عمره ما وقف قبل كدة في صيدلية اما خريجي التجارة والحقوق والاداب .......الخ فدول بقى ربنا معاهم لانهم هم نفسهم مش عارفين اتخرجوا من ايه؟ وليه اتخرجوا اساسا؟
وكله كوم بقى والتعليم والجامعات الخاصة دي بقى كوم تاني.....دي بقى معمولة للناس المحترمة والشيك علشان ما يتساووش بالهاموووش بتوع الجامعات الحكومية اللي ببلاش دي.....ياي حاجة تقرف فعلا
المفارقة بقى ان الجامعات الخاصة دي فيها امكانيات عالية جدا بس فيها طلبه مش غاويين تعليم اساسا اما الجامعات الحكومية ففيها ناس نفسهم يبقوا حاجة بجد بس يا خسارة مفيش اصلا الامكانيات اللي بتؤهلهم لكدة.
وعمرنا ما سمعنا ان الطلبة متضايقة من واقع تعليمها المؤلم ولا حاجة واهم بيتخرجوا وهم ساكتين وصابرين ومتحمسين لحجز اماكنهم في اقرب كوفي شوب.
اما بقى الموظفين فحدث ولا حرج جيوش جرارة من العاملين بالحكومة والقطاع العام واللي اكتر من 60%منهم فائض اصلا عن حاجة العمل بس تقول ايه بقى......ان فاتك الميري اتمرغ في ترابه
ولسه كتير وكتير من طوائف الشعب المصري الجميل اللي بيعانوا وبيقاسوا الامرين ومع ذلك لا تسمع لهم حس ولا خبر بس هم طالبين حاجة واحدة بس انهم يعيشوا مجرد يعيشوا ويتنفسوا هوا وياكلوا ويناموا.
ولو ان الاكل دة كمان مش مضمون في ظل حالة التسرطن وامراض الكلى والكبد اللي بتهاجم المصريين بس برضة في الموضوع دة هم صابرين ماهو قضاء الله وقدره برضة.
السادة حكام مصر ورجال حكومته وحزبه الوطني:
هنيئا لكم بهذا الشعب العظيم اللي لو لفيتوا العالم كله مش هتلاقوا زيه ابدا ,هو فيه زي المصري اللي ياما انضرب وبينضرب ولسه هينضرب وبيقول كمان والنبي كمان.
وشعاره دايما:
ضرب الحبيب زي اكل الزبيب

1 comment:

  1. im sorry i cant write in arabic , i dont have an arabic keyboard, i have just ordered one.

    unfortunately all arab countries are the same , they complain about the dictators , and they criticize and insult him behind closed doors but if the dictator gives a speech they ll be singing Birouh bidam nafdeeka ya foulan . same mentality. we do not have real men anymore. i asked my mom , what happened to the brave men who freed us from france (im algerian) or the brave libyans who freed libya , she said they dont make them anymore. if france wants to invade , people will say yes please . at least we ll have jobs and plenty to eat and our roads will be clean without rubbish like inthe 60s .

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails