Saturday, 10 March 2007

رجلان وانقلابان




النهاردة لفت نظري في" المصري اليوم" موضوع عن موريتانيا واتجاهها نحو الديمقراطية بعد انقلاب 3 اغسطس 2005 بقيادة العقيد علي ولد محمد فال اللي قام بانقلاب عسكري بيحصل عادي جدا في الدول العربية والافريقية واستولى على السلطة في ظل سفر الرئيس ايامها معاوية ولد احمد الطايع لمهمة خارج موريتانيا.
لحد هنا الاحداث عادية جدا راجل عسكري استغل غياب رئيسه في مهمة عمل وقرر انه يستولى على الحكم (حصلت قبل كدة كتير وبتحصل) انما اللي محصلش قبل كدة في الدول اللي نعرفها وحبايبنا وجيراننا ان الرجل طلع انه لم يستولي على الحكم انما اعتبر نفسه وسيلة لنزع الحكم من حكومة غير شرعية وحاكم استبدادي واعتبر نفسه فترة انتقالية يتم خلالها اجراء انتخابات حرة نزيهة (بس دي غير نزيهة بتاعتنا) وتسليم السلطة للي الشعب يختاره ويكون مقتنع بيه حتى لو كان الجن الازرق
الرجل اول ما عمل الانقلاب دة قال الكلام دة وطبعا عدد كبير من الناس والمراقبين والمهتمين قالوا كلهم بيقولوا كدة في الاول وعلى رأي عمرو دياب والكلام الحلو بيتحول.
انما اللي حصل ان الكلام الحلو دة ماتحولش بالعكس دة اتحول لواقع ملموس بتعيشه موريتانيا الايام دي من انتخابات سليمة تماما في ظل مجلس حكم انتقالي محدش منهم رشح نفسه ومالوش اي مصلحة ان فلان يفوز او علان ينجح الا مصلحة بلدهم اللي بيحبوها ونفسهم انها تعلى فوق اي اغراض مصلحية وشريرة.
عدد كبير من المعارضين بيقارنوا بين الموقف دة وموقف القيادة المصرية المتشبث بالسلطة واللي بيرى انه بدونهم الشعب المصري دة ممكن يموت لانه شعب مش عارف مصلحته فين ولو قامت انتخابات نزيهة وسليمة ممكن يجيبوا حد مش مناسب للحكم وبالتالي البلاد تغرق
هم بيقولوا كدة ان تشبثهم بالسلطة انما الغرض منه مصلحة البلاد ليس اكثر ولا اقل وان لا مصالح شخصية على الاطلاق بالعكس دة الحكم دة مرهق جدا ومسئولية جسيمة ولو تواجد البديل فورا هنسلمه السلطة.
انا النهاردة ما بتكلمش ومابعلقش على الموضوع دة انا النهاردة بحب اقارن بين انقلابين في دولتين عربيتين افريقيتين, الانقلابين قام بيه اتنين عسكريين :
الاول هو انقلاب 23 يوليو 1952 في مصر والتاني هو انقلاب 3 اغسطس 2005 في موريتانيا الاول طبعا قام بيه البكباشي جمال عبد الناصر حسين والتاني قام بيه العقيد علي ولد محمد فال.
بس الاول بتاع يوليو 1952 في مصر شاف ان الديمقراطية خطر رهيب على المجتمع المصري وان الشعب المصري دة شعب لا يفهم شيء في اي شيء وماينفعش نعمل انتخابات حرة نزيهة لان الشعب المصري مش عارف مصلحته وممكن يختار حد يبوظ مكاسب الثورة.
وكان في واحد مصري كان بيفكر زي علي ولد محمد فال كدة بس كان اسمه محمد نجيب قال نرجع للجيش ونعمل انتخابات ومن ينجح يحكم ولكن كااان خلاص شهوة السلطة اشتغلت والكرسي بدأ يكون مريح وبالتالي الرجل دة كان مصيره تحديد اقامته واهانته لحد ما مات من القهر ومن الحزن على بلد كان نفسه وبيتمنى لها مستقبل افضل من كدة بكتير.
وشوية شوية الانقلاب اتسمى ثورة وجمال عبد الناصر اصبح اسطورة ومصر كل يوم عن يوم مساحة الديمقراطية عماله تقل وتقل لحد ما استبدلنا الملك ب 12 ملك وانهيارات اقتصادية وهزائم عسكرية واذلال في كل المجالات وحكم عسكري لابس مدني (بص حواليك وشوف كام محافظ ورئيس مدينة ورئيس حي ورئيس شركة كبرى) من ضباط الجيش السابقين.
الانقلاب التاني بقى بتاع 3 اغسطس 205 كان انقلاب علشان خاطر موريتانيا ناس شايفين ان بلدهم تستحق اعلى واعلى ناس ما قللوش من قدرات شعبهم ولم يحجروا على رأيهم وحقهم في اختيار من يحكمهم ماقالوش اصلهم ممكن يجيبوا حد غلط لان مفيش حاجة اسمها حد غلط وحد صح في حاجة اسمها اختيار الشعب واللي الشعب يختاره لازم يحكم حتى لو كان مين
ناس شايفين انهم ضباط جيش مش شايفين نفسهم حكام شايفين ان الديمقراطية هي الامل الاخير لاصلاح احوال بلدهم
شفتوا الفرق بين انقلاب عسكري تم من 54 سنة ولحد دلوقتي بنعاني من ويلاته وانقلاب تاني تم من اقل من سنتين وبدأت موريتانيا تجني ثماره فهنيئا لهم.

لو لم اكن مصريا لوددت ان اكون موريتانيا

3 comments:

  1. حسن مدني10 March 2007 at 15:57

    كلامك صحيح تماما، ولكن لا تنسى انقلاب عبد الرحمن سوار الذهب، الذي سلم السلطةبعد سنة بالضبط لحكومة منتخبة..
    أكثر الله أمثالهم،
    تحياتي

    ReplyDelete
  2. hi iam rania
    thanks for visiting my blog
    and i read ur last post and i like it
    i guess that u right
    but if i would nt be egyptian iwill be aegyptian i cant change it
    any way
    the song: u have to choose one form 6rbtop or any site for songs but it has be real player and u'll find a code for the song firstly search for the link and after that search for the html code
    if u cant find it i have a friend who have this code<< so tell me about the song and inshallah i'll bring u the code after that put it in ur page element
    thats it
    thanks again
    bye

    ReplyDelete
  3. عاوزين نستورد واحد من عينة ولد فال او سوار الذهب شوفيلنا الصيني منة بكام والأفريقي بكام وانا واثق اننا لو فتحنا باب التبرع لتمويل مشروع انقلاب عسكري و قائد يقودة و انتخابات حقيقية كل مصري حايمد ايدة في جيبة و يدفع اللي يقدر علية علشان ينتهي عصر الاستعباد اللي طٌول قوي

    الا طبعا شلة الحرامية المستفيدين من الوضع الحالي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails