Tuesday, 13 February 2007

هلاوس ليلة كلها احباط

حد جرب قبل كدة انه يكون متضايق من غير سبب؟!!!شوية حزن كدة على ذكريات على مواجع بتتقلب على بدايات دور برد.
سكون ليل على اغاني رومانسية وحزينة على برامج تليفزيون بعضها ممل وبعضها مستفز وبعضها التاني منحاز بشكل رخم.
تمسك الريموت تلاقي ان ال 3 برامج اللي بتطحن في بعضها 90 دقيقة والعاشرة مساءا والقاهرة اليوم مفيش واحد فيهم ممكن تتفرج عليه واحد منهم ماسك هالة سرحان بقاله 3 ايام سلخ وتقطيع والتاني قررانه يتبنى وجهة نظرها ويشكك في مصداقية الاول والتالت بقى قرر انه يتجاهل الموضوع برمته ويسبح في تيار لوحده خالص.
والتلاتة بقوا مملين جدا.
تقرر انك تسمع الراديو تلاقيها شغالة اغاني رومانسية وهادية وانت اصلك موودك وحش فالدنيا بتبوظ اصلا معاك.
بتفتكر ان الحياة كانت زمان احلى بكتيير وان كل سنة بتكون اوحش من اللي قبلها وبتكتشف ان انت كنت مغفل وماحسبتش حساباتك صح وان كان افضل ليك لو ماكنتش دخلت الكلية دي ووصلت للي انت فيه دلوقتي.
وتقعد تقلب بقى حياتك واللي حصل معاك وتحس ان انت اساسا بني ادم نحس وكل ماتروح حتة او مكان يبووظ.
وبعدين تكتشف ان انت بتشتغل شغلانة انت اساسا مابتحبهاش بس للاسف ماتعرفش لو سبت الشغلانة دي هتشتغل ايه اصلا لانك انسان مش موهوب اساسا.
فقررت انك تنهي الليلة دي بقى وتنام اكتشفت بعد محاولات مضنية ان انت مش جايلك نوم اصلا وان الارق هيموتك وطول مانت عندك ارق طول ما دماغك عمالة تتضرب في الخلاط وبيطلع كوكتيل احباط على يأس على ندم على سوء حظ.
بتفكر انك تكلم حد من صحابك بتكتشف ان انت معدش ليك صحاب اصلا اللي سافر واتجوز ونسي اهله يبقى هيفتكرك انت.......؟
واللي انت مقاطعه اصلا علشان هو ندل ومايستحقش انك تعرفه.......واللي مابيكلمكش غير لما يكون عايز منك حاجة فانت قررت انك ماتكلموش واللي انت كلمته كتير قوي قبل كدة وهو مابيتصلش خالص فكرامتك نقحت عليك وحلفت مانت متصل بيه الا لما يتصل بيك الاول.
تقول طيب مااكلم الحتة الطرية اللي في حياتي........تكتشف ان انت اصلا معندكش حتة طرية في حياتك لانك كنت واضح ومحترم وانت في الجامعة وكنت مقرر ان مفيش ارتباط الا لما تكزن تقدر تخطب وتتجوز ولما قدرت تعمل كدة فعلا اكتشفت انه ماينفعش لان اللي ربط ربط من زمان يا معلم وكله مضبط اموره من زمااااااااااااااااااااان ولا عزاء للمحترمين.
يكبس عليك النوم وتنام وانت بتدعي ربنا ان بكرة يكون احلى

5 comments:

  1. بسم الله الرحمن الرحيم
    الفاضل /احمد
    تحية طيبة
    مبروك عليك وعلينا انضمامك الينا فان شاء الله تكون اضافة الينا بما تحمله من فكر جديد شاب وطموح الى الافضل
    اخى ارجو من الله ان يخلف ظنك وتغير اسم مدونتك بعد ان يصبح غير ذى معنى عندما تتكلم الاغلبية الصامته والى لقاء قريب ان شاء الله

    ReplyDelete
  2. welcome 2 yahoo group
    u can visit me in myblogger & i'll be happy 2 see ure comments

    takween2007.blogspot.com

    ReplyDelete
  3. welcome 2 yahoo group
    i'll be happy 2 see ure commint on my blogger
    takeen2007.blogspot.com

    ReplyDelete
  4. Looks like a new cinema has just opened in Cairo. It is quite expensive to get in and you don't really know what movie you will be watching until you are in your seat. There are days the movie is exciting and you get to see people throwing shoes at each other and there are days when it is quite dull. All the movies have not passed the censor and some of them are cheap remakes of the original ones. You can even bring in your own popcorn or nuts if you have a "Wasta"! If you don't like the movie that is showing you can fall asleep. You even get paid to attend. Either way you are spending someone else's money. The poor Egyptian tax payer remember them?
    Come and check out the pictures and tell me what you think.
    http://egyptiankangaroo.blogspot.com/

    ReplyDelete
  5. mأخى أحمد سمير
    سعدت جداً بدونتك
    شعرت كأنها مدونتى
    وشعرت كأننى أنا الذى أكتب فيها
    أشكرك
    وسأحاول قراءتها كلها بسبب خفة دمها
    أخوك
    حسن عمر
    http://abohamdy.blogspot.com

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails