Sunday, 18 February 2007

نائب السيارات

مش غريبة ابدا ان واحد من نواب البرلمان عن الحزب الوطني يطالب انه تكون سيارات اعضاء مجلس الشعب الموقرين معفاة من الجمارك!!!
مش غريبة ابدا وهتكون غريبة ليه اذا كان السادة النواب اصلا مش نواب من الاساس مالهمش دعوة بالشعب اللي على الورق بس دول نوابه وهو اصلا الشعب هو اللي قعدهم على الكراسي اللي قاعدين عليها؟!!!واساسا الشعب دة اصلا يملك القدرة انه يقول للنائب العظيم دة احنا مش هننتخبك تاني؟!!!طبعا لا لسبب بسيط جدا وهو انه ماانتخابوش اولاني.
وعلشان اللي مش فاهم يفهم والكلام يكون واضح :
الاخ عمرو اديب في برنامجه القاهرة اليوم ذكر ان احد نواب الحزب الوطني طالب مجلس الشعب باصدار تشريع يتيح للسادة نواب الشعب امكانية استيراد سيارات فارهة من الخارج معفاة الجمارك.
وهنا والكلام على لسان عمرو اديب دوت القاعة بالتصفيق الحاد تعبيرا عن رضا نواب المجلس الموقر عن الطلب.
طبعا الاخ العضو الموقر اللي ماتقالش اسمه ومحدش عايز يقول اسمه (طبعا لانه حزب وطني) مبرره في ذللك ان النواب هم واجهة للشعب ولازم يظهروا بمظهر مشرف ونسي سيادته ان الشعب اللي اصلا ماانتخابهوش من الاساس يهمه انه يظهر بمظهر مشرف في المجلس مش في العربية وان الشعب المطحون اللي كل الجرايم دي بترتكب باسمه نفسه يلبس هدوم نضيفة ويشرب كوباية مياه صحية ويركب مواصلة ماتنتهيش بيه للقرافة ونفسه ان الناس تتجوز وتلاقي سكن يلمها ووظيفة شريفة تنجده من البطالة وبلاويها وبعد كل دة ما يتحقق من حق بقى النواب ان شاء الله يركبوا حتى طيارات معفاة من الجمارك مش مجرد عربيات.
وطبعا سارع السادة عتاولة الحزب الوطني زي السيد كمال الشاذلي والسيد زكريا عزمي بأدانة الطلب البشع دة بتاع نائب العربيات وابدوا استنكارهم بشدة للطلب الغريب بتاع النائب اللي على راسه ريشة دة وطبعا مارضيوش يقولوا على اسمه ابدا (خد بالك بقى لو النائب دة مستقل ولا المصيبة لو كان اخوان مسلمين) ماكانش اتقال اسمه بس لا دة كانت هتنزل صورته في الصفحة الاولى في جرايد الحزب الوطني المسماة سابقا باسم الجرايد القومية وتحتها مانشيت جريمة برلمانيه جديدة.
بس عمرو اديب نسي يسأل عتاولة الحزب الوطني عن نوع العربيات اللي بيفضلها سيادتهم وهل ياترى هي معفاة من الجمارك ولا صنع في مصر.
في بلد بيعاني نصها تقريبا من الامية والفقر والجهل ويستشري فيها المرض انتشار النار في الهشيم وييجي نايب عايز يجيب عربية معفاة من الجمارك لمجرد انه نايب في البرلمان وبالتالي يستحق الامتياز العظيم دة
يبقى مستقبل البلد دي مظلم مظلم مظلم
وبقول لكل شاب
طريقك مسدوود مسدووود مسدووووود يا ولدي

1 comment:

  1. انا مش فاهم اية اللي بيتقال دة

    انا من اكتر من 18 سنة وانا اعرف ان كل عضو مجلس شعب من حقة يستورد عربية من الخارج و يدخلها بدون جمارك
    اذكر وانا في ثانوي كان صاحبي وزميلي اللي بناخد مع بعض دروس حد قريبة عضو مجلس شعب و جاب عربية من الخارج بالاعفاء الجمركي بسبب عضوية المجلس وان صاحبي شرحلي ان قريبة جاب مرسيدس وزنق نفسة في فلوس علشان يجيب عربية غالية لانة مرة في العمر ولو جاب عربية رخيصة مش حاينفع يغيرها ويجيب غيرها بعد كذا سنة لان الاعفاء مرة واحدة بس


    وكمان لي صديقة بتشتغل في وزارة المالية وتحديدا في الجمارك ويا محاسن الصدف هي مسؤلة عن الاعفائات الجمركية يعني اعضاء المجلس و اعفائات المعوقين و هيئات الاستثمار و هيئات حكومية و دبلوماسية

    وما اكثر ما يرتكب بأسمك يا إعفائات جمركية

    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails