Monday, 31 December 2007

النهاردة 31 ديسمبر


في يوم 31 ديسمبر 2006 الساعة 7 مساءا كتبت تدوينتي الأولى
وكانت عن وداع 2006 واستقبال سنة 2007 وتساءلت هل 2007 هتكون زي 2006 وهيكون احمد زي الحاج احمد؟
وانا بقرأ التدوينة دي النهاردة يوم 31 ديسمبر 2007 وبحتفل بمرور عام كامل على مولد مدونتي الأغلبية الصامتة...استرجعت احداث سنة كاملة من التدوين...سنة من الافكار...سنة من الاحداث...سنة من الافراح وسنة من الاحزان
سنة مرت بحماسها وبيأسها بأحباطاتها وبتفاؤلها
سنة خلصت وعدت....غيرت فيا حاجات كتير وماغيرتش في مصر اي حاجة على الاطلاق
فضائيات وصحف بتحتفل بالافضل في جميع المجالات
وبدون اي نظرة تشاؤمية مني على الاطلاق بأقول وبالفم المليان
لم ينجح احد في 2007
يوم 31 ديسمبر 2007 بيمر على مصر ومفيش اي اختلاف بينه وبين 31 ديسمبر 2006 على الاطلاق
نفس الشعب النائم ونفس الاستغلال والفساد والبطالة....نفس الاعلام الحكومي الموجه ونفس الاعلام المستقل والمعارض المتحمس...نفس الحاكم ونفس الحاشية ونفس مجلس الشعب وهو هو مجلس الشورى...لسة برضة الحزب الوطني موجود...لسة ايمن نور في السجن..لسة مرتضى بيفتح الملفات...لسة الاخوان في السجون...لسة المحاكم العسكرية شغالة....لسة نظيف رئيس وزراء ولسة الاسعار بتزيد....لسة الناس مش لاقية لبن اطفال مدعم ولسة الادوية بتغلى....لسة احمد عز بيحتكر الحديد....لسة معظم المحافظين لواءات شرطة وجيش....لسة اسعار الشقق نااار...لسة في شباب مصري بيطفش لايطاليا...لسة الشباب بيتجوزوا عرفي...لسة نواب الشعب بيصفقوا...لسة الانتخابات بتتزور....لسة الشوارع زحمة...لسة الواسطة...لسة المسلمين ما بيصوموش في يوم واحد..لسة العيد في مصر غير اللي في السعودية غير العيد في ليبيا...
لسة علب الصفيح موجودة في مصر...ولسة ناطحات السحاب بيبنوها اهل دبي....لسة العرب بيذلونا ببترولهم..ولسة المصريين بيعايروهم بجهلهم....لسة تامر امين في البيت بيتك..ولسة منى الشاذلي بتتألق في العاشرة مساءا....لسة المصري اليوم هي امل مصر في صحافة محترمة...لسة صحافة الحكومة بتشيد بأمريكا لما امريكا تشيد بالحكومة...ولسة نفس الصحافة بتلعن امريكا لما بتنتقد الحكومة.....لسة سواقين الميكروباص بيحتلوا الطرق...لسة كل كام شهر عمارة بتقع...لسة الافلام السينمائية بتهجم علينا في الصيف...لسة الجامعات الخاصة بتتعمل كل يوم...لسة الثانوية العامة هي بعبع كل بيت...لسة الاهلي بياخد الدوري...لسة الزمالك حاله لا يسر عدو ولا حبيب...لسة محدش عرف سعاد حسني اتقتلت ولا انتحرت...لسة المفتي بيفتي...ولسة شيخ الازهر بيجامل الحاكم...لسة صباح بتغني....لسة اللبنانيين بيتخنقوا مع بعض...لسة الجولان محتلة...لسة حوادث الطرق مستمرة بنجاح ساحق....لسة البوم عمرو دياب بيكسر الدنيا...لسة البنات دايبين في تامر حسني....لسة عادل امام بيمثل...ولسة رمضان هو شهر المسلسلات.....لسة ميلودي بتتحدى الملل...ولسة زووم ع المكشوف....ولسة روتانا فاتحة لنا عينينا وبتورينا اللي عمرنا ما شفناه.....لسة افراح اولاد المسئولين ورجال الاعمال بتتكلف الملايين..ولسة الغلابة مش لاقيين الملاليم...
لسة مصر زي ماهي
مصر لم تتغير في 2007
مصر 31 ديسمبر 2006 هي برضة مصر 31 ديسمبر 2007 بس يارب تكون غير مصر 31 ديسمبر 2008 ...
.بس تكون مختلفة للأفضل لأن مفيش اسوأ من كدة
على كل حال:
سنة سعيدة
مصر في 31 ديسمبر 2007


الى من يهمها الامر:
تواريخ مش هتتنسي مهما طال بي العمر:
يوم 27 يونيو2007
يوم 22 اغسطس 2007
يوم 15 اكتوبر 2007
وجودك في حياتي هو اهم احداث 2007
ربنا يخليكي ليا

Wednesday, 26 December 2007

ثوابت خنقاني


لو انت راجل تليفزيونجي (غاوي تليفزيون) او جورنانجي (غاوي و متابع للجرايد) وكمان ليك شوية صغيرين في السياسة على شوية بسيطة كدة في الرياضة....هتكتشف ببساطة ان اعلامنا المصري عايش على شوية ثوابت في الكلام والحوار لا تتغير من يوم ما وعيت ع الدنيا.
حفظناها عن ظهر قلب
وان في كلمات وحوارات في الاعلام لازم تكون متبوعة ببعض الالفاظ بعدها علشان تعدي وتمر من الرقابة والمساءلة القانونية او الجماهيرية او النقدية.
وعلشان نوضح الصورة اسمح لي اني اقول شوية امثلة بسيطة علشان تعرف ان احنا عايشين في زمن القوالب الجامدة والخوف الاعلامي الشديد:
ومهما السنين بتعدي وهامش الحرية بيتسع شوية ويضيق شوية الا والقوالب الجامدة دي موجودة ولا يمكن المساس بها على الاطلاق
ماتلاقيش اي حوار بيتكلم عن القوات المسلحة وينقدها.....اتحداك انك تكون شاهدت منظر زي كدة او حتى قريت حوار لحد بينتقد القوات المسلحة
وكأن القوات المسلحة وقياداتها دي منزهة عن الخطأ.....دة حتى طلعت السادات ماغلطش فيها على الاطلاق ولا جاب سيرتها بسوء ومع ذلك لبس تهمة اهانة للقوات المسلحة
نفسي اعرف ايه الحكمة من عدم انتقاد القوات المسلحة وكأن انتقاد اي شيء بيقلل من هيبته...وهل نقد اي فرد او مؤسسة بيعني اهانتها او التقليل من شأنها؟
واذا كانت الاجابة لا....يبقى ليه الجيش والقضاء منزهين عن النقد ؟
بلاش دي
ليه كل ماحد يتكلم عن القضاء المصري لازم يشيد بنزاهته وطهارته وكفاءته....ولازم تلاقي عبارة ان القضاء المصري مشهود له بالنزاهة على مستوى العالم
طيب قضاء مين اللي مش مشهود له بالنزاهة؟!!!!!!!
هم القضاة دول مش ناس مننا....فيهم الجيد وفيهم السيء......فيهم ناس نفسها أمارة بالطيب والتقوى والعدل وكمان ممكن تلاقي فيهم ناس نفسها أمارة بالسوء؟
وبعدين تلاقي حد طالع بينتقد حكم قضائي مش على مزاجه او هواه وبيقول اللي هو عايزه واللي نفسه فيه وبعدها لازم يختم كلامه بأحترامه للقضاء ونزاهته وقدسيته.......................!!!!!!!
اما بقى الشرطة.....فحدث ولا حرج
نفسي حد يتكلم عن الشرطة بدون ما يشكرها على مجهودها الكبير والرهيب في حفظ الأمن والأمان للوطن والمواطن
على الرغم ان دي شغلتهم اساسا
وهي وظيفة اي شرطة في اي مكان في الدنيا ايه غير كدة؟
يعني بنفس المنطق لازم اشكر كل طبيب علشان بيعالج مرضاه...ولازم احيي كل صيدلي صرف دواء لمواطن مريض.....وكمان البقالين...لابد من شكرهم الوفير على توفيرهم للجبنة والزيتون في محلات البقالة بتاعتهم
وبعدين فين الامن والامان دة اللي بنشكر الشرطة علشان وفرتهم؟!!!!!!
نفسي الاقي حد اعرفه اتسرقت منه حاجة والشرطة رجعتها له تاني؟
حد سمع عن حد اتسرق منه تليفونه او سيارته او حتى شقته..وراح عمل محضر وبعدها بكام يوم رجعت له مسروقاته؟
وبعدين من ضمن القوالب الصماء في الاعلام ان لازم كل مانتكلم عن تعذيب الشرطة للمواطنين نتبعها بكلمة قلة
قلة من ضباط الشرطة
بس نفسي حد يقول لي القلة دي كام واحد بالضبط؟
قالب كمان تلاقيه متلازم في اعلامنا وهي عند الحديث عن رئيس الجمهورية وتوجيهاته...لازم رئيس الجمهورية هنا يشار اليه بكلمة (القيادة السياسية)....تحس ان كلمة رئيس الجمهورية هنا عورة ماينفعش تتقال
على الرغم ان رئيس الجمهورية هو القيادة السياسية وان القيادة السياسية هي رئيس الجمهورية
فتلاقي المسئول من دول (اللي هو اصلا مش مسئول عن اي حاجة) تلاقيه بيقول....والقيادة السياسية مهتمة بالموضوع الفلاني
طب ماتقول يا عم ان رئيس الجمهورية هو اللي مهتم...ولا هي فزلكة وخلاص
طب سيبك من السياسة يمكن معذورين برضة ويمكن التعليمات اللي بتتوارثها الاجيال مؤثرة عليهم شوية.....
الرياضة كمان فيها ثوابت اعلامية ما ينفعش معلق او مقدم برامج رياضية محترم يحيد عنها والا يبقى نهاره اسود من قرن الخروب
اهمها طبعا التوازن بين الاهلي والزمالك في كل شيء واي شيء....ماينفعش يشيد بنادي من غير ما يشيد بالتاني.....لا يمكن ابدا ينتقد نادي منهم من غير ما يمسي كدة على النادي التاني بنقداية صغيرة بدون اي سبب
ماينفعش يقول اسم الاهلي قبل الزمالك او اسم الزمالك قبل الاهلي والا جمهور النادي التاني يزعل......قمة التفاهة والله.
لو اي معلق رياضي مالتزمش في برنامجه او في تعليقه على الماتش بالموضوعات دي هيبقى ليلته مش معدية
من يوم مااتفرجت على كورة والحكاية دي بتحصل....كرهونا في الكورة ربنا يسامحهم.
اما بقى في المجال الفني....فدول بقى ملك تاني خالص...
عايشين في دولة جوة الدولة
تسمع حوار لأي فنان او فنانة تخاف ع الناس دي من الحسد من كتر حبهم لبعض....وتلاقيه او تلاقيها عمال يشرح باستفاضة رهيبة عن مقدار الحب اللي كان اللوكيشن غرقان فيه وان فلان دة انسان جميل...(بالمناسبة انا مش عارف ليه اضافة كلمة جميل لوصف اي حد في الوسط الفني) تحس انها عدوى عندهم
ويا سلام لما تسمع فنانة بتوصف تصوير اخر مشهد من مشاهد فيلمها وقد ايه التأثر والدموع المصاحبة لنهاية تصوير الفيلم او المسلسل.
كلام محفوظ عن ظهر قلب...انا ساعات بأردد اجابة السؤال قبل ما يسأل من كتر ماانا سمعت اجابات السؤال دة قبل كدة

اما بقى عن الشو اللي بيتعمل لما ممثل بيموت فدي حاجة مكررة لدرجة الملل.....الناس دول يا جماعة اصبح عندهم قدرة رهيبة على التمثيل حتى جوة حياتهم الخاصة

افتكروا معايا جنازة احمد زكي واللي بعض الممثلين والممثلات عملوه عند وفاته....انا نفسي حسيت ان التمثيل انتهى في مصر خلاص وان الناس دي مش هتعرف ترجع تمثل تاني من كتر الحزن والكأبة اللي هم فيه

اسبوع ليس اكثر ولقيت اللي كانوا مموتين نفسهم دول...مموتين نفسهم برضة بس من الرقص في الحفلات الخاصة واعياد الميلاد

وهلم جر......نصيحة

لو فنان توفى الى رحمة الله ولقيت زميلة له بتبكي بحرقة اوعى تتأثر وانتظرها في اقرب عيد ميلاد او حفلة وشاهد ابداعاتها

كل اللي فات دة كان بعض بعض وليس كل الثوابت والقوالب الجامدة اللي اتعودنا عليها سواء في السياسة او في الرياضة او في الفن , ولم تعد تلفت نظر الكثيرين من تكرارها؟

ياترى هييجي يوم ونتخلص من قوالب الاعلام دي

نفسي اعلام بلدنا يحترمنا

اشك




Thursday, 20 December 2007

نفسنة حريمي



دخلت معاها في جدل عقيم لم يسفر عن شيء
ايهمااكثر متانة وصدق وقوة؟
صداقة الصبيان لبعضهم؟
ولا صداقة البنات لبعضهن؟
انا عن نفسي مؤمن تماما ان الرجال مع بعضهم رجالة.....صداقتهم متينة لا تتأثر بالتفاهات والهيافات..لا تهزها عوامل الغيرة والنفسنة
مفيش راجل بيغير من واحد صاحبه...مفيش ولد بيحس بالحسرة ان صاحبه وانتيمه خطب او اتجوز قبله.....!!!!!
مسمعناش عن ولد افسد علاقة واحد صاحبه بخطيبته علشان غيران منه ولا زعلان انه سبقه في الجواز
ماسمعناش كتير عن ولد فضح واحد صاحبه ولا صوره في اوضاع غير لائقة؟
مش كتير برضة الشاب اللي بيخطف خطيبة واحد صاحبه على الرغم ان النسبة دي في البنات مش قليلة
طبعا في حالات استثناء وحالات شاذة بس بتفضل برضة النفسنة الحريمي سمة مميزة بين بنات حواء
بصت لي شذرا وقالت لي:
ايه الكلام العجيب اللي انت بتقوله دة
دة الاخلاص في البنات
دي الصداقة يعني بنات
دة البنت لصاحبتها يعني سرها
اولاد يعني عنف يعني غدر يعني صراع ومنافسة
انما
بنات اصحاب يعني رومانسية يعني هدوء يعني حب
ماوصلناش لحل وسط
سيبتها وكل منا مقتنع باللي في دماغه
ومشيت ولسان حالي بيقول
ان كيدهن عظيم

Thursday, 13 December 2007

لعن الله من ايقظها

واعداها للقائها في صيدلية لقاء 100 جنيه
تشديد أمني بمدينة مصرية بعد توقيف مسيحيين مارسا الفاحشة مع مسلمة
فرضت الشرطة المصرية إجراءات أمن مشددة في مدينة اسنا الجنوبية الأربعاء 12-12-2007، بعد توتر طائفي في المدينة، تسبب به الاشتباه بعلاقة جنسية بين شابين مسيحيين وفتاة مسلمة. وقال شاهد عيان إن قوات الشرطة تحرس متاجر ومنازل المسيحيين، وتفرض ما يشبه حظر التجول في حي بالمدينة، شهد ليل الاثنين تجمهر مئات المسلمين خارج متجر اشتبهوا بوجود شابين مسيحيين بداخله ومعهما طالبة جامعية مسلمة يمارسان الجنس معها.

وأضاف أن مئات من أفراد قوات مكافحة الشغب انتشروا في الشوارع. وقالت مصادر أمنية ان المسلمين الذين تجمهروا أمام المتجر أمسكوا بالشابين وسلموهما للشرطة، بينما سلموا الفتاة الى أسرتها قبل وصول القوات. كما أشعلوا النار في المتجر، وحطموا زجاج صيدلية يعمل فيها الشابان المسيحيان. وقال مصدر ان عاملا مسيحيا في المتجر هرب خلال تجمهر المسلمين. وأضاف أنه تردد بين المسلمين الغاضبين أن الشابين واعدا الفتاة في الصيدلية، وأنهما اتفقا معها على اعطائها 100 جنيه (أي ما يوازي 18 دولار). وأشار مصدر قضائي إلى أن النيابة العامة في المدينة أمرت بحبس الشابين 4 أيام على ذمة التحقيق معهما، كما أمرت بضبط واحضار الطالبة وعامل المتجر الهارب.ويمثل المسيحيون ما يصل الى 10% من تعداد السكان في مصر. وقنا التي تبعد عن القاهرة حوالي 600 كيلومتر هي المحافظة المصرية الوحيدة التي بها محافظ مسيحي
فيه ايـــــــــــــــــــــــــــــــــــــــــــه؟
ايه اللي بيحصل يا جماعة؟
مومس بتمارس الدعارة بفلوس مع شباب
فارقة معاكوا قوي اذا كان الشباب دة شباب مسلم ولا مسيحي؟
التجمهر والفوضى والتخريب دة سببه الفعل نفسه (الفاحشة نفسها)....ولا سببه ان الفعل دة بين مسلمة ومسيحي؟
يعني لو كان العكس هو الصحيح...وكانت الفتاة هي اللي مسيحية والشابين كانا مسلمين الموقف كان هيبقى ازاي؟
كان هيحصل ثورة برضة؟
الحادثة دي مش حادثة اغتصاب....دي عاهرة بتمارس الجنس بفلوس مش فارق معاها مين اللي هيدفع الفلوس دي سواء كان مسلم او مسيحي او يهودي او حتى بوذي
الموضوع مالوش علاقة بالديانات على الاطلاق.....وكم من مرة بيكون العكس هو الصحيح بتكون المومس مش مسلمة وبيكون الشباب هم المسلمين
وبعدين عاهرة وزباينها هيكون فارق معاهم قوي موضوع الديانات دة؟
ليه الناس بتعالج المواضيع دي بطائفية على الرغم ان الموضوع دة ابعد مايكون عن كدة
لو افترضنا ان اطراف الواقعة دي جميعهم مسلمين....او ان افرادها كلهم مسيحيين...هل كان اسلوب المعالجة هيكون بالشكل دة؟
مستـــــــــــــــــــــــــــــــــــــــحيـــــــــــــــــــــــــــــــل
على الرغم ان الفعل واحد في كل الاحوال الا اننا مصممين على الطائفية
احنا ناس غريبة جدا.....شعب في منتهى الغرابة...الفعل مش فارق معاهم على الاطلاق...اللي فارق معاهم ان ازاي مسلمة تمارس الجنس مع اقباط على الرغم انه في جميع الاحوال هو زنا حتى لو كانت بتمارسه مع مسلمين
كان هيجرى ايه لو تم التحفظ ع الجميع في الصيدلية دي وتم ابلاغ الشرطة وقبضت ع الجميع وخلاص؟
انما لا طبعا.....ازاي؟ مايصحش......لازم نعرات طائفية وتخريب وتدمير
الفتنة نائمة لعن الله من ايقظها

Saturday, 8 December 2007

انفصام

حاجة غريبة جدا احنا بنعملها واحنا مش عارفين...او من غير ما نحس ان احنا بنعملها
بندين ونشجب ونندد بسلوكيات احنا بنشوفها سلوكيات مرفوضة ومنحرفة وفي نفس الوقت اول ما بتيجي لنا الفرصة دي بنعملها فورا وبمنتهى البرود
انا بتكلم عن حاجة زي الواسطة
كلنا بيلعن الواسطة وممكن نعمل مجلدات شجب وادانة وتنديد بالواسطة والمحسوبية وان محدش في البلد دي بياخد وضعه وحقه الا بالواسطة ومع ذلك تعال كدة راقب نفسك وشوف تصرفاتك
رخصة عربيتك ورخصة سواقتك طلعتهم ازاي يا معلم؟
رحت المرور وامتحنت واخدت دورك ولا دورت على اونكل فلان اللي في المرور او الواد ميدو صاحبك اللي عمه ضابط وممكن يوصي عليك علشان تطلعها
بلاش دي
وانت في الكلية...عمرك ما دورت على واسطة قبل ما تدخل امتحان العملي او الشفوي...دة انت في عرض درجة تنجح بيها يا راجل
طب وانت رايح مجلس المدينة علشان ترخيص مباني ولا علشان تركب المية والنور لشقتك او رايح تدفع فاتورة التليفون...عمرك ما سألت ماما عن واحدة صاحبتها في السنترال مثلا ولا سألت بابا قبل كدة عن عمو فلان اللي في مديرية الاسكان؟
بلاش دي كمان
لنفترض مثلا انك قررت ماتعتمدش ع الواسطة وانك تتعامل كمواطن عادي بريء ورحت تخلص حاجتك بنفسك..وانت بقى واقف وسط المطحنة دي لقيت طنط سوسن صاحبة ماما بتنادي عليك وبتقول لك انت جاي تعمل ايه هنا؟هات ورقك اما اخلصه ليك؟
هتعمل ايه بقى يا معلم؟!!!!هتسيبها تخلص لك ورقك ولا هتعمل فيها عم الفارس المغوار مكافح الواسطة؟
احنا ليه عندنا ازدواج في الشخصية...ليه بنلعن الحاجة ونعملها؟
كلنا بنكره الواسطة والمحسوبية وانا اول واحد بكرهها وبشمئز منها..ولما اسمع حكاية من حكايات الكوسة دمي بيغلي...بس لما بحتاج لها بألجأ اليها
مين مننا دمه مش بيغلي لما بيسمع عن ان فلان استاذ الجامعة عين ابنه معيد ولا علان المستشار عين ابنه اللي قعد 8 سنين في كلية الحقوق وكيل نيابة؟
بس برضة مين فينا لا يتمنى لو ان ابوه أمن له مستقبله وضبطه تضبيطة العمر؟
مين فينا مش بيتجنن لما يلاقي نفسه متعطل ومش عارف ينجز مصلحة ويلاقي واحد تاني الورق بتاعه بيخلص من غير ما يتعب نفسه ويقف حتى دقيقة واحدة؟
بس لو انت تمتلك الامكانيات ان ورقك يخلص بنفس الطريقة ماكنتش هتتردد
اعترف وانا في كامل قواي العقلية (اللي ممكن تكون غير قوية اصلا) اني كائن يكره الواسطة والمحسوبية والكوسة ومع ذلك يبحث عنها بملقاط لتخليص مصالحه المتعطلة وبأكون في قمة سعادتي لما الاقي فراش او ساعي في اي مصلحة ممكن يعفيني من المرمطة والعطلة في اي مصلحة حكومية تسوقني اقداري اليها

Tuesday, 4 December 2007

فيرتيجو.....VERTIGO



مش بتحصل كتير اني الاقي تفسي مشدود لحاجة من منظرها الخارجي...ومن غير ما اعرف تفاصيل الشيء دة
انما حصلت مع الرواية دي (فيرتيجو) ......وكلمة فيرتيجو دي كلمة انجليزية معناها الدوار.....الدوخة يعني.
وللرواية دي معايا حكاية بدأت من موقع الفيس بووك وبالتحديد في المجموعة الخاصة بدار ميريت للنشر.
لقيت بوستر غلاف الرواية على المجموعة دي...ومكتوب عليه رواية سينمائية
مش عارف ليه شدني الغلاف وحسيت منه ان الرواية دي اكتر من مميزة على الرغم ان الغلاف لا يوحي بأي شيء من احداث الرواية ولا يدل اذا كانت مميزة ولا لا؟
بس قررت اني لازم اقرأ الرواية دي
وقد كان
الرواية بتدور احداثها في 402 صفحة.....ونصيحة بقى...فضي نفسك يوم علشان تقدر تخلص ال 402 صفحة دول في قعدة...لأنك مش هتستحمل انك ماتخلصهاش في قاعدة واحدة.
كمية تشويق واثارة في الرواية دي غير طبيعي.....لغة بسيطة مفيهاش فلسفة ولا تعقيد......تعرية لواقع بلد منكوب بفساد كباره وصغاره برضة احيانا.
هتحس ان انت جوة الرواية دي...ماشي مع البطل في الشارع...ساكن معاه...بتحارب معاه...بتفرح لفرحه وبتحزن لحزنه...همومك هي همومه هي هموم بلد
صحيح ممكن جدا الرواية تصيبك بالأكتئاب لأستشراء الفساد بالشكل الرهيب دة....فعلا ممكن تحس ان جو الرواية في مجملها..مُقبِض
الا انه للأسف هو دة الواقع
طبعا من السهل جدا انك تستشف بعض الشخصيات الواقعيى اللي موجودة في الرواية ودي مش محتاجة ذكاء كبير من القارىء....فتلاقي رجل اعمال متهم في قضية مخلة بالشرف وتلاقي مسئول كبير وابنه ناهبين البلد.
والحقيقة ان احمد مراد الكاتب المبدع لم يبخل علينا بشوية تلميحات لتوضيح بعض الشخصيات اللي في الرواية....بس الحقيقة ان لو فعلا الفساد اللي بيشع من الرواية دي موجود بالشكل البشع دة.....يبقى مصر دي هتنتهي تقريبا خلال 10 سنوات من دلوقتي على اقصى تقدير
اما بقى عن احمد مراد...الكاتب
يمكن دي اول مرة اسمع عنه او اقرأ له حاجة....بس لو كان في العمر بقية .....مش هتكون المرة الاخيرة ان شاء الله
اعتقد ان دي روايته الاولى...بس لما تبقى بدايته بالإبداع دة....اعماله القادمة ان شاء الله هتبقى عاملة ازاي؟!!!!
انا مش ناقد متخصص ولا ادعي ني قريت روايات كتير...انما فيرتيجو حسيت انها مكتوبة بفكر شاب مصري معجون في البلد دي...وموجهة لناس بيحبوا البلد دي
عارف ان عدد كبير لسه لم يقرأ الرواية....بس اتمنى ان اللي بيدور على حاجة محترمة يقراها انه مايفوتش الرواية دي
رواية فعلا تستحق الكثير

Tuesday, 27 November 2007

شورت كارول


زمان....اهلنا ربنا يسامحهم كانوا بيعلمونا حاجات غلط.....
ماكنتش عارف انها غلط...الا لما كبرت وعرفت ان اكيد احنا الغلط
زمان قالوا لنا ان لكل مقام مقال...وان كل مكان له اللبس الخاص بيه
يعني ما ينفعش تروح حفلة بالبيجاما.....ولا تلعب كورة بالبدلة
وفضلت مقتنع بالكلام دة لحد يوم الاثنين اللي فات لما شفت الست المطربة اللبنانية اللوزعية
كارول سماحة
الست كارول قررت تطلع في التليفزيون المصري وفي اهم برامجه (البيت بيتك) بـــــــــــــــــــــــــــــــــــــالشورت
اه والله كانت لابسة شورت
في التليفزيون المصري....وفي اواخر شهر نوفمبر اللي المفروض ان الدنيا برد
الا انها قررت تظهر بالشورت
انا طبعا ماصدقتش نفسي....وقعدت ادعك في عيني يمكن انا اللي مش شايف صح...يمكن الست مظلومة وانا اللي عيني اللي مدغششة
انما للأسف خاب ظني تمااااااااااااااااااما....هو بعينه شورت
لابسة شورت
ياللهول
انا بتفرج على اي قناة....يمكن ال
LBC
ويبقى ساعتها عداها العيب......ابدا......دي القناة الثانية في التليفزيون المصري
ومين اللي معاها دة؟
اه هو......هو بتقل دمه اللي لا يحتمل
هو
تامر امين
او بمعنى اخر
تامر مبهور امين
الاخ تامر مش مصدق هو كمان نفسه....بس للأسف شعور الاستياء والاندهاش اللي عندي كان عنده شعور بالفرحة الشديدة وعدم التصديق والانبهار بشورت الست كارول سماحة
لك ان تتخيل استوديو واقف فيه كارول سماحة بشورتها الساخن واستفزازها لمشاعر المصريين البسطاء اللي اكيد البيت مش بيتهم ومعاها تامر امين اله الواسطة والمحسوبية واستغلال النفوذ لدى قدماء المصريين
توقعت ان المهزلة دي هتنتهي باتصالات هاتفية من شوية مشاهدين غيرانين على تليفزيون بلدهم من المنظر القميء دة...وان الست كارول جايبة معاها الاستوديو كام طقم اكتر حشمة هتلبس واحد منهم بقية الحلقة...ولكن بلا جدوى
استمرت الحلقة بنفس الشورت الساخن
وكأن الست كارول سماحة بتقول لكل الشباب المصري...موتوا بغيظكم...اولعوا
المرة دي هطلع بالشورت والمرة الجاية مفاجــــــــــــــــــــــــــــــــأة
اللذيذ بقى ان الاخ تامر تقل الدم امين مبسوط وفي قمة سعادته وعمال يلقح بالكلام وكم هو مش قادر يستحمل حلاوة كارول وجمالها وعايز الناس تدعي له كان الله في عونه
السؤال هنا بقى:
ممكن واحدة مصرية تطلع بالمنظر دة في التليفزيون المصري؟!!!!!
اشك تماما
بل اكاد اجزم ان ماينفعش اصلا راجل يطلع بالشورت في برنامج حتى لو كان رياضي
تخيل انت مثلا احمد شوبير طالع في برنامجه بيحلل مباراة لكرة القدم وهو لابس شورت ساخن!!!!!!
يبقى ليه المغنية اللبنانية دي تطلع بالمنظر دة في التليفزيون المصري؟!!!!!
هل هو نوع من كرم الضيافة؟
وهو كرم الضيافة ممكن يوصل للدرجة دي؟
علشان نكون متفقين
انا طول عمري مؤمن بمبدأ ان اللي مش عاجبه مايتفرجش
بس الكلام دة في ميلودي ومزيكا واو تي في.....الخ
انما المبدأ دة لا ينطبق على برنامج جماهيري اعلى نسبة مشاهدة متوقع منه ان البرنامج يقدم لي اخبار ومعلومات مفيدة واذا بي الاقي هوت شورت ومذيع بيستظرف
لكن العيب مش عليهم
العيب على اهلنا اللي معرفوش يربونا
هم بيعرفوا يلبسوا.....انما احنا ما بنعرفش نتفرج

Friday, 23 November 2007

رأيه


الدعوة للحملة دي وصلتني عبر الميل من احد المجموعات البريدية الدينية
الموضوع دة للي مش متابع له جذور من حوالي 10 ايام
ساويرس (رجل اعمال مصري ومن اغنى اغنياء العالم وصاحب عدة مشروعات ضخمة اشهرها بالنسبة للمصريين شبكة موبينيل) عقد مؤتمر صحفي واتكلم في موضوعات كتير من ضمنها تعبيره عن اندهاشه من انتشار الحجاب في مصر بشكل ملحوظ وانه منزعج بشكل شخصي على الرغم من احترامه للحجاب على حد تعبيره
وقال ان شوارع القاهرة دلوقتي بتحسسه انه في طهران من كتر المحجبات وانه اصبح بيحس بالغربة في مصر
اللي فات دة كان رأي ادلى بيه نجيب ساويرس
رأي
بأكرر
رأي
مش قرار
نجيب ساويرس مواطن مصري بيغبر عن رأي خاص بيه هو عن رفضه لتنامي ظاهرة الحجاب وزيادة المحجبات في الشارع المصري....هل رأي ساويرس دة هيمنع الحجاب في مصر؟
ساويرس لما اعلن انه ضد الحجاب..بنات مصر قرروا يخلعوا الحجاب استجابة للدعوة الساويريسية المباركة؟
انا على حد قناعاتي الشخصية ان اللي عايزة تتحجب بتتحجب...واللي بتحب تلبس ملابس عارية بتلبس....ماعتقدش ان رأي نجيب ساويرس هيغير من الأمر في شيء.......!!!!!!
في اختراع في العالم اسمه الليبرالية وحرية الرأي....الراجل بيعبر عن رأيه في رفضه لشيء معين عليه اساسا اختلاف بين المسلمين نفسهم.....
ممكن جدا ان يتم الرد عليه من خلال رأي برضه بدون غلط ولا تجريح ولا اهانة ولا نعته بالكافر والفاسق
هيحصل ايه لو تم الرد عليه من خلال مؤتمر صحفي برضة زي اللي عمله وتم الرد عليه بالمنطق والحجة والبرهان والرأي بالرأي؟
المواقف العنيفة اللي بياخدها التيار الاسلامي ضد خصومه في الرأي او اللي بيعتقد انهم خصومه...مواقف بتضعف منه بشكل كبير قدام المجتمع الخارجي وكمان قدام المسلمين المعتدلين
زمان علمونا ان الصوت العالي بيضعف من موقفك ولو كنت صاحب حق....ودة اللي بيعمله اصحاب الحملات دي
ارجوكم
احترموا حق الاخرين في ابداء اراءهم طالما بتتم بدون تجريح في ثوابتنا الدينية.....اتعلموا ثقافة الاختلاف بدون تحريض وحملات اثبتت دائما فشلها

Saturday, 17 November 2007

يا بختهم

على الرغم ان ظاهريا مفيش فوارق شاسعة بين مصر وباكستان من حيث المساحة
مصر مساحتها مليون كم مربع
باكستان مساحتها 800 الف كم مربع
وكمان من حيث عدد السكان
مصر عدد سكانها يقترب من ال80 مليون نسمة مرشحين للزيادة المطردة
باكستان عدد سكانها 150 مليون نسمة
والبلدين من اكبر البلاد الاسلامية والبلدين بيحكمهم العسكروالبلدين حليفتين لأمريكا
بس بيبقى اختلااااااف جوهري بين البلدين.....الا وهو الشعبين
والصورة ابلغ من مليون كلمة
لو لم اكن مصريا لوددت ان اكون باكستانيا

Wednesday, 7 November 2007

بورصة الأسامي


وانا قاعد كدة مع نفسي وبتأمل احوال الدنيا والحياة.....خطرت على بالي فكرة ممكن تظهر انها فكرة طبقية شوية....انما لو فكرت معايا في الفكرة دي كويس....ممكن تلاقيها والله فكرة مش بطالة خالص
تخيل الاسامي بقت بفلوس؟
اه والله....انا بتكلم بجد....ليه الاسماء بتاعت الناس ماتبقاش بفلوس؟
ويبقى ليها تسعيرة وبورصة وكل اللي عايز يسمي ابنه اسم معين يدفع رسوم الاسم دة ويسمي زي ماهو عايز
هتبقى بورصة وعرض وطلب وكل اسم هيبقى ليه ثمن.....على حسب العرض والطلب...وهتبقى فيه معايير كتير لتحديد سعر الاسم دة...منها مثلا هو اسم مودرن ولا لا؟ الطلب عليه كتير ولا قليل؟
الاسامي اللي الطلب هيبقى عليه كتير سعرها هيقل طبعا والعكس صحيح
كمان عند تحديد السعر هيتحدد مين من المشاهير وعلية القوم بيحمل الاسم دة
كمان هيبقى في اسامي برة التسعيرة دي على الاطلاق طبعا نظرا لمكانتها زي اسماء الله الحسنى المسبوقة بكلمة عبد زي عبد الله,عبد الرحمن,عبد الحليم........الخ
وكمان اسماء الرسول عليه الصلاة والسلام هي كمان هتكون برة الاسعار دي طبعا زي احمد ومحمد ومصطفى.......الخ
انما بقى لو جينا نلعب في الباقي زي شادي وهيثم ولؤي ونزار ووائل....الخ.....كل الاسامي دي في البورصة يا معلم...وكل واحد وفلوسه
ممكن حد يسألني طيب وايه الحكمة في كدة؟
اجاوب:
اولا: فايدة مادية فلوووس طبعا بالكوم هتدخل خزينة الدولة على اساس طبعا ان عملية الولادة في الشعب المصري عملية تلقائية لا ارادية بتحصل بالآلاف يوميا
ثانيا: فايدة معنوية ومنطقية مش معقول كمية اللخبطة وعدم المنطقية اللي في اسامي المصريين دي....حاجة تلخبط فعلا
ممكن تلاقي شخص الفقر اكل عليه وشرب وحالته في الضياع وبيتسول وتلاقي بعد دة كله اسمه هاني مثلا
بتحصل والله
وممكن كمان تلاقي شاب هاي جدا وحاجة اوروبي خالص وكلاس وتلاقي اسمه مفاجأة غير سارة خاااالص عيسوي مثلا ولا قدري على اسم جده
وعلشان مايحصلش لخبطة وتبقى الوجاهة بتبدأ من الاسم يبقى حتما ولابد الاسم يبقى بفلوس علشان اولاد الذوات يبقى لهم اساميهم واولاد ال.........مش ذوات يبقى لهم اسامي تانية خالص
ثالثا:هنوفر على السادة مدمني الوسايط (جمع واسطة) انهم يكلموا حد كبير ساعة الزنقة في كمين مرور مثلا او في كبسة مخدرات....على اساس ان الشاب بيبان من اسمه زي الكتاب مابيبان من عنوانه كدة
فمثلا ييجي سيادة اللواء يسأل الشاب...اسمك ايه ياد؟
لو قال له هاني مثلا او كريم يعامله باحترام ويقول له احنا اسفين على الازعاج ياابني..من اسمك باين عليك انك ابن ناس
اما بقى لو قال له دياب مثلا..يبقى الواد ليلته سودة زي اسمه
ايه رأيكم بقى
فكرة تستحق الدراسة ولا لا؟
وبعدين هي جت ع الاسامي يعني؟ماكل حاجة في البلد دي بفلوس
فاضل الاسامي يخصخصوها....ويبدأ من تاريخه التداول في بورصة الاسامي

Thursday, 1 November 2007

الفلاحين


السادة الفلاحين المصريين الغير محترمين:
ربنا يحرقكم

مش عارف بصراحة ادعي عليكم واقول ربنا ينتقم منكم على تلويثكم للجو والشروع في قتلنا بدخانكم ولا ادعي على اللي سايبكم تعملوا كدة فينا وهو ولا على باله ماهو مش خسران حاجةولا ادعي على اللي من الاول عمل لكم قيمة وسط البشر وانتم اساسا بسلوكياتكم دي وغيرها لا ترقوا لمستوى البني ادمين اساسا

انا طبعا عارف ان الدخان والتلوث دة لو كان واصل بالبشاعة دي لمصر الجديدة كانت الدنيا قامت ولم تقعد....وبالتأكيد الدخان والاختناق والتلوث دة مش واصل ل6 اكتوبر والا كان الفلاحين اعدموا
انما بما ان المتضرر الاول من الدخان اللي في الجو دة هم ناس عاديين جدا عايشين في الشرقية او الغربية او اي محافظة من محافظات الدلتا المنكوبة فبالتأكيد الموضوع ليس على درجة عالية من الاهمية

طبعا.......دة اخر حاجة ممكن كبار القوم دول يفكروا فيها هي صحة الناس.....دة على افتراض ان احنا ناس اساسا

اما بقى بالنسبة للفلاحين

مش ممكن يكون لسه في في الدنيا ناس كدة
جهل وتخلف ومرض....ومش بس مرضى لاااااااااااااااااااااااا دول شغلهم الشاغل تصدير المرض للغير
حد يخطف رجله لأي عيادة صدر في اي محافظة ريفية زي الشرقية او الدقهلية او الغربية واتفرج على المرضى اللي منتظرين في العيادة للكشف عليهم
هتلاقي حوالي 70% من المرضى المنتظرين دول....فلاحين
طيب الناس دي بيشتكوا من ايه؟
صعوبة شديدة في التنفس وامراض حساسية وبعضهم الموضوع بيتطور معاه اكتر من كدة
طب مين السبب في الكلام دة؟
الدخان والتلوث الفظيع اللي مالي الجو اليومين دول بسبب حرق قش الارز
طب مين اللي بيحرق؟
الفلاحين
طب مين اللي عيان وهيموت بسبب الدخان دة؟
الفلاحين
الله يحرق الفلاحين

Monday, 29 October 2007

تاااج جااامد جدااا


تاج جميل ممتع جايلي من اكتر من صديق وصديقة عزيزة
مش اسمها عزيزة.....انما صديقة عزيزة
جايللي من حسام (الشغاااال) ومن رانيا (المشاعر) ومن بس بس (الروح) ونخش بقى ع التاج علشان هو طويل....ويمكن اطول مني شوية
لو قالولك اختارعصر من عصور مصر عشان تعيش فيه تختار اى عصر وفى عهد اى حاكم واشمعنى؟
الحقيقة كل عصور مصر المحروسة على مدار التاريخ لها مالها وعليها ماعليها ومانقدرش نقول ان في عصر كان احسن من اللي قبله
تلاقي عصر ازدهرت فيه حاجة واتدمرت فيه حاجات تانية كتير وهكذا
ولذلك فان العصر اللي اتمنى اعيش فيه ويكون كل واحد بياخد فيه حقه ومفيش واسطة ولا محسوبية والبني ادم فيه محترم وكرامته مصانة في بلده وبيمارس حقوقه كاملة
ومفيش فيه جهل ولا فقر ولابطالة.....اعتقد ان العصر دة لسه ماجاش اصلا ومش منتظر ان احنا نشوفه قريبا
اول اولوية فى حياتك عيلتك ولا شغلك ولا اصحابك؟
رغم ان التلات حاجات دول ماينفعش يتم وضعهم في مقارنة مع بعضهم لأن كل واحد له اولوية مختلفة تماما عن الاتنين التانيين
الا ان الشغل هو الاول......ليه بقى؟
علشان من غير الشغل واللي بيقدمه ليا شغلي مش هكون محترم قدام نفسي ولا قدام عيلتي ولا كمان قدام صحابي.
ايه اكتر حاجة بتحبها فى رمضان ؟
احترام المواعيد وتقديسها
الافطار بميعاد والسحور بميعاد وماينفعش حد يتأخر ولا ياكل لوحده
وبالتالي احترام المواعيد دي بتنعكس على الترابط والتلاحم بين الاشخاص
اللى بيبوظ الحكام ..نفسهم ولا الشعب ولا الحاشية المقربة؟؟
الحاكم لو ماكنش عنده استعداد انه يبقى فاسد وبايظ ولا الجن الازرق هيعرف يبوظه
انما لأنه من قرارة نفسه عنده استعداد كبير لتزيين الفساد والانحراف سهل جدا انه يبوظ وبيتم تبرير دة من خلال ان الحاشية فاسدة او ان الشعب مستكين ومستسلم للفساد وغلبان
انما انا بشو ف ان رأس الفساد هو الحاكم الحاكم الحاكم اذا اصلح صلح المجتمع كله واذا فسد....البلاد تدمر تماما
مين اكتر اعلامى مصرى بتحترمه؟؟
حمدي قنديل-مجدي مهنى
اما باقى المحترمين زي منى الشاذلي وعمرو اديب ومعتز الدمرداش فدول احب اتفرج عليهم واحترمهم جدا انما يبقوا برضة انهم بيشتغلوا بشعار انا عندي عيال عايز اربيهم
لو ممكن تشتغل شغلانة تانية غير اللى انت بتشتغلهااو كنت بتشتغلها كنت تتمنى تبقى ايه؟؟
صحفي
بس مش صحفي من بتوع قائد سفينة الوطن ولا ربان المركب المصري ولا الحاجات دي
انما صحفي بقلم حر شريف.....قلم ليبرالي يحترم جميع الاراء ويقدرها ويكون شعاره فعلا اللي بيطبقه في حياتهالاختلاف في الرأي لا يفسد للود قضية
ايه تانى بلد تتمنى تعيش فيها بعد مصر؟؟
ماينفعش اعيش في اي مكان تاني غير مصر
حاولت وماقدرتش
مصر بالمصريين اللي بجد اللي بيحبوها وبيخافوا عليها.....والله هتكون جنة
احنا مقوماتنا كبيرة قوي يا جماعة بس لو عايزين
اوصف ليا ترتيبات اجمل فرح ممكن تحضره؟
اجمل فرح ممكن احضره هو فرح كل اللي حاضرين فيه بيحبوا العريس والعروسة من قلبهم
مش مجرد انهم جايين الفرح علشان مظاهر اجتماعية ولا تأدية واجب والسلام
ساعتها هيكون اجمل فرح فعلا بصرف النظر الفرح دة مكانه فين.
بتراعى كلام الناس والقيل والقال؟ لو اه او لو لا قولى ليه؟
براعيه في الاصول بس يعني لو بعمل حاجة انا اخجل منها لازم اراعي كلام الناس لأنهم في الحالة دي اكيد بيكون معاهم حق
انما لو انا واثق من نفسي وليا اسبابي يبقى كلام الناس مايسواش عندي اي حاجة
صحيت من النوم مالقيتش الموبايل ولا الكمبيوتر ولا الكاميرا الديجيتالولقيتنا رجعنا لعصر الحمام الزاجل والحصنة حتبقى سعيد؟
طبعا في البداية هيجي لي صدمة حضارية شديدة وممكن تلاقيني قاعد كتير مذهول...بس هتكيف على الوضع الجديد وهبتدي اتعامل مع الواقع حتى لو كان مؤلم
بس الفكرة هنا...على مااتكيف مع الواقع ممكن اخذ وقت قد ايه؟
السعادة هى؟؟
الرضا ثم الرضا
ايا كان الواقع طالما انا راضي بيه تبقى هي دي السعادة
عندك امل ؟ اسبابك ؟
طبعا عندي امل...وامل كبير كمان
واسبابه هو ان دوام الحال من المحال وان الايام دول
بمعنى ان مفيش حاجة بتفضل على حالها على الاطلاق
لما تحب تهرب من كل شىء بتروح فين؟؟
بحاول اخرج نفسي من الموود اللي مخليني عايز اهرب
بمعنى اني لو متضايق من الشغل وعايز اهرب منه يبقى لازم اخد اجازة
لو متضايق من البيت يبقى لازم اسافر
على حسب اللي مخليني عايز اهرب...باهرب
امتى مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟
لما ابص في اعلانات الجرايد لوظيفة معينة كانت من كام سنة بينطبق عليا شروطها من حيث السن ودلوقتي ماينفعش علشان انا اتخطيت السن بتاع الوظيفة دي
لما بتعمل عمل خيرى بيكون ايه هو دافعك الاول؟؟
رضا الله....هو الدافع الاول وييجي بعديه رضا النفس...اني احس ان ربنا اعطاني نعمة ولازم اشكر ربنا عليها بأني افيد بيها ناس معندهمش النعمة دي
بتشرب سجاير؟لو الاجابة اه ايه شعورك لو شفت ست بتشرب سجاير وليه؟
لا مش بشرب سجاير خالص ولا شيشة
اما بقى الست المدخنة...فهي نظرة ومن غير زعل على الاطلاق..
نظرة احتقار
وعلى طول بيكون سلوكها واخلاقها محل شك
بتعرف ايدك اليمين من الشمال ازاى؟
سبحان الله....معرفة رباني كدة من غير سبب
ايه اكتر اله موسيقية بتحبها؟
الناي
الة حزينة بحب قوي اسمعها بالليل....كلها حزن وشجن
فى رأيك ليه الذوق والنخوة اتعدموا؟
انا في رأيي انهم انعدموش ولا حاجة
الشهم موجود وقليل الاصل موجود برضة....كله موجود وانت وحظك هتصادف في حياتك اي منهم
ايه الحاجة اللى لو حصلتلك تبقى سعيد قوى؟
ان كل احلامي تتحقق
واحس ان انا عملت اللي عليا في الحياة وانتظر بقى تصاريف القدر بعد كدة
تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟
انا شخصيا بحب اخذ حقي ناشف
احب الفلوس اللي في البنك وانا بقى هتصرف
البحر ولا النيل؟
البحر طبعااا
فيه حركة وحياة
عاقل ولا مجنون؟
الاتنين مع بعض
ساعات ابقى في منتهى العقل وساعات بتطلب معايا لحظات جنون
بس ارجع واقوللك
مفيش مجنون بيقول على نفسه انا مجنون
لو قال كدة
اعرف على طول انه في منتهى العقل
تقرا كتاب ولا تتفرج على فيلم؟
على حسب الموود ساعتها
ممكن جدا موودي مود قراية وبالتالي اقرا الكتاب ولو شدني ممكن اخلصه في قعدة
وممكن الاقي نفسي مش طايق اقرا سطر وبالتالي المشاهدة هنا هي الحل
بتمرر التاج لمين
لأي حد قرا التاج دة عندي وشاف ردودي على الاسئلة وعرف يستنبط جزء من شخصيتي
بس للأمانة
احلى تاج جاللي في المدونة دي
بهديه ليك ياللي بتقرا السطر دة

Tuesday, 23 October 2007

تعذيب وتعذيب

عارف ان البوست دة هيجر عليا متاعب لا حصر لها وانتقادات كتيرة ابسطها اني عديم الانسانية واني لا استحق الحياة اساسا لأني بني ادم غير ادمي
الموضوع دة عن التعذيب في اقسام الشرطة وعن سلوك ضباط الشرطة في مصر نحو مواطنيهم
انا عن نفسي بفرق بين نوعين من التعذيب او استعمال القوة
اول نوع هو استعمال القسوة مع النشطاء السياسيين او المعارضين للنظام ودة طبعا مرفوض تماما على اساس ان الشرطة هنا مابقتش شرطة انما بقت خرزانة في ايد الحاكم....بالأضافة طبعا ان الناس دي غالبا مابتكون مثقفة ومحترمة ومهمومة بقضايا وطنها وكل همها ان حال البلد دي ينصلح
وبالتالي استخدام القسوة والتعذيب مع الناس دي لمجرد ان رأيهم مش عاجب الحاكم......دي جريمة لا تغتفر وتستوجب محاكمة مرتكبيها.
انما النوع التاني بقى من استخدام القسوة والتعذيب فخاص باستخدام القسوة مع الحرامية والسوابق والمسجلين خطر....ودة بقى بصراحة لا يثير في اي استياء او امتعاض على الاطلاق.
وعلشان تلتمس العذر لشخص ما لازم تحط نفسك في موقفه
تخيل ان شقتك او عربيتك اللي حيلتك اتسرقت......وقبضوا على مشتبه فيه.
تفتكر انت هتكون مهتم ان عربيتك اللي حيلتك ترجع ليك ولا هتكون مهتم اكتر بالمعاملة الادمية اللي بيلقاها الحرامي في قسم الشرطة
انا متأكد تماما ان انت هتقول ان شاالله تقطعوه حتت واقطعه انا كمان معاكم بس عربيتي ترجع لي.
وهو دة اللي بيحصل...لما عيل يسرق كابلات الكهربا بتاعة الناس ولا مسجل خطر سرقات ولا حرامي شقق ولا واحد بلطجي يتضرب في القسم لما يبان له صاحب...فيها ايه دي؟
ماهو اصلا في الاساس حشرة تستحق السحق والقتل مش الضرب بس
اومال المطلوب ان الضابط في القسم ياخده يقول له عملت كدة ليه يا حبيبي؟
معنتش تعمل كدة تاني علشان احبك
لو رجعت للسرقة والبلطجة تاني هحرمك من المصروف؟
انتم لو شفتم واحد بس من الحرامية والبلطجية دي ممكن جدا تقول للضابط عنك انت انا اللي هقتله مش هضربه بس
يا اخوانا:
بأقر واعترف تماما ان الشرطة في مصر معاملتها للناس في منتهى السوء وان عدد كبير جدا من ضباط الشرطة في حاجة لتربية من اول وجديد
بس مع البلطجية والحرامية والسوابق هي دي اسلوب المعاملة المثلى وماينفعش يتعاملوا غير كدة

Friday, 19 October 2007

زمن المسخ

منة فضالي
ممثلة نصف معروفة
"لو ملاك نزل لي من السما وقال لي اتحجبي.......برضة مش هتحجب"
فعلا والله على رأي عادل امام:
احنا في زمن المسخ

Sunday, 14 October 2007

الرضـــــــــا


الرضــــــــــــــــــــــــــــــــــا
انا بحس ان الرضا هي كلمة السر للسعادة في الدنيا دي
هو الرضا ومفيش غير الرضا
فكروا كدة معايا......السعادة في الدنيا دي احتار الناس في تفسير اسبابها.....يعني ايه سعادة؟.....ايه هي السعادة؟
ناس كتير قالوا في الفلوس وقالوا ان من غير فلوس وثروة مفيش اي سعادة.........بس دة مش حقيقي بدليل ان في ناس معاها ملايين ومش سعيدة على الاطلاق وبتحرق في دمها وبتستهلك اعصابها علشان المليون يبقوا عشرة والعشرة يبقوا 100 والمية يبقوا مليار
وبنشوف ناس مش معاها فلوس بس سعيدة وعايشة حياتها وبتدبر امور حياتها على حسب امكانياتها......الناس دي راضية بحياتها كدة مبسوطة وقانعة
طبعا مفيش حد بيكره الطموح والسعي للمكسب.....والكل بيدور على المال...بس في ناس بتفضل ساخطة وناقمة مهما ربنا اعطاها من نعمه وبيطلبوا اكتر بس مع عدم رضا وقناعة باللي في ايدهم حاليا
وفي ناس تانية بتحمد ربنا وتشكر فضله وتبوس ايدها وش وضهر على اللي ربنا قسمه ليها وبتدعي ربنا بالرزق اللي لو زاد يبقى فضل ونعمة ولو ماجاش تبقى نعمة من ربنا.
يبقى السعادة مش في الفلوس.....يمكن في الصحة؟
برضة لا.....السعادة مش في الصحة..بدليل ان ياما ناس اصحاء وفي اتم صحة وعافية وتلاقيهم بيقولوا هعمل ايه بالصحة من غير فلوس...انا عايز فلوس...انا صحتي في الفلوس...يارب خد مني الصحة وخليني اغنى راجل في العالم
وناس تانية مرضى وبعضهم مريض بأمراض مزمنة وعضال وتلاقيهم راضيين وقانعين باللي كتبه ربنا لهم....طبعا بيدعوا ربنا انه يمن عليهم بنعمة الشفاء ولكن فرضا لم ينعم الله عليهم بالنعمة دي.....هيكفروا؟ هييأسوا من رحمة ربهم؟
بالطبع لا.....وبالتالي السعادة مش في الصحة ولا كمان في المال....وبالقياس بقى على كل النعم اللي ربنا بينعم بيها علينا...بتلاقي ناس سعيدة وتلاقي ناس حزينة وممكن السعداء دول تلاقيهم محرومين من متع كتيرة من متع الحياة وممكن كمان تلاقي التعساء دول بيمتلكوا نعم لا حصر لها بس ماامتلكوش اهم فضيلة بينعم بيها ربنا سبحانه وتعالى على عباده
الرضا والقناعة

Tuesday, 11 September 2007

قطعني حتت

و كأن الزمن ما بيمشيش
وكأن المشهد دة من كتر جماله وحلاوته واعجابنا الشديد بأحداثه بنعيده ونكرره بكل تفاصيله من غير ما نمل ولا نزهق ولا حتى نغير فيه شوية
من يوم ما وعيت على الدونيا الفانية دي وانا بتابع نفس السيناريو
مصري في بلد عربي بيتبهدل وبيتهزق وبيتمسح بكرامته الارض....
.تقوم الصحف المصرية واخدة خبر بالموضوع دة....تقوم كدة على استحياء متكلمة على خفيف في الموضوع....يقوم كل كاتب يزايد ع التاني ونبرة الصوت تعلى وتعلى...وبعد اسبوع ولا اتنين يتحول الحدث دة لمقال افتتاحي لبعض الصحف
الموضوع يسخــــــــــــــــــــــــــــــــن.....تقوم صحف البلد الي بهدلت المصري دة ولعنت جدود اللي جابوه ترد هي كمان ويتحول الموضوع لتراشق بالالفاظ والكلمات بين صحف مصرية وعربية
يقوم يطلع مسئول من البلد دي يطمئن الشعبين الشقيقين على متانة العلاقات وقوتها وانها فوق الصغائر والدسائس وان كل الحوادث اللي حصلت واللي هتحصل واللي بتحصل دي مجرد حوادث فردية وان الدنيا لسة بخير وانه بيوعد الشعب المصري العظيم بزيادة الاستثمارات الوطنية في مصر وبالتالي فرص عمل جديدة والكلام دة
وفجأة وبدون سابق انذار تتوقف المشاحنات والمشاغبات ما بين الصحف وبعضهل وسكتم بكتم ويتحول الموضوع الى حديث للذكريات في انتظار حوادث جديدة......واي خدمة وابقى تعالى كل يوم
اللذيذ بقى والطريف جدا ان الواحد من كتر الحوادث اللي هي المفروض فردية بيننا وبين السادة العرب الواحد بقى عارف تماما اسلوب كل دولة من الدول دي في رد الفعل بتاعها على اي تجاوز مصري في حقهم (دة طبعا على اساس ان غضبنا من سحل وضرب وبهدلة مصري في بلادهم دة بيسموه تجاوز مننا)......بفلوسهم طبعا
بالنسبة لليبيا....على طوووووووووول قفل حدود وممنوع دخول المصريين وتصريحات عن ضرورة توفيق المصريين لأوضاعهم هناك....وفي غضون ساعات يتم ارسال وفد مصري رفيع المستوى علشان يتحايل ويبوس دماغ قائد الثورة ويقوله احنا اسفين معدناش هنعمل كدة تاني.....دة انت الحبيب وضرب الحبيب زي اكل الزبيب
اما الكويت فدول ناس محترمة الحقيقة بيكتفوا بالردح في الجرايد هم يقولوا لنا انتم جاعنين وشحاتين واحنا اللي بنصرف عليكم...واحنا نترحم على صدام حسين ونقول الله يرحمك يا بطل كنت مربيهم ومعلمهم الادب
بس دة طبعا قبل ما يطلع مسئول كويتي يوعدنا بزيادة الاستثمارات ويفكرنا بالاخوة اللي بين الشعبين والحكومتين والزعيمين
اما بقى بالنسبة للسعودية....فدول ناس دماغهم عالية موت...بيكتفوا بالصمت تماما مع وعد بمزيد من التنكيل والتعذيب للمصريين على اراضيهم
وزي ماشايفين كدة...كل دولة بتتعامل معانا بأسلوبها على الرغم من ان اسلوبنا في المواضيع دي واحد مع كل الدول دي وهو خضوع وذل ورعب من انها تشحن لنا المصريين اللي عندها وترجعهم وبالتالي مزيد من وجع الدماغ للحكومة اللي هي مكبرة دماغها اساسا ع الاخر وبالتالي لازم نسايس الدول دي ونتعامل معاها بمبدأ قطعني حتت وارميني للقطط
عموما:
نداء لكل اخ عربي:
اضرب كمان وكمان...عذب اكتر واكتر...اسحل دة المصري بيحب يتسحل قوي...حد ياراجل يلاقي بلد عاملة اوكازيون على مواطنيها ومايستفيدش بالعرض دة
اضرب وعذب المصري...وتعال بلده واتفسح واستمتع وبلطج عليه كمان لو حبيت
طبعا
دة البيت بيتك

Saturday, 11 August 2007

واحنا مالنا

وفاء قسطنطين تعلن اسلامها وتؤكد انها كانت في ضلال وانها عرفت طريقها
ماريان وكريستين يهربوا من بيت اهلهم ويشهروا اسلامهم ويعلنوا انهم لن يعودوا للضلال مرة تانية
محمد حجازي يعلن تنصره وانه من زمان وهو مسيحي ومقتنع تماما بأنه اصبح رجل مسيحي ونفسه يثبت كدة رسميا علشان ابنه رامي او بنته سارة لما يتولدوا يكونوا مسيحيين
انباء غير مؤكدة عن ان سعاد حسني اعلنت مسيحيتها قبل ما تموت
كل اللي فات دة عناوين واخبار شغلت الرأي العام لفترات طويلة وفي اوقات متفرقة
الأخبار اللي فوق دي مالهاش عندي غير رد واحد بس:
واحـــــــــــــــــــــــــــنا مالــــــــــــــــــــــــــــــــــــــــــــــــنا
انا مالي انا ان وفاء قسطنطين اسلمت ولا محمد حجازي اتنصر.....هو انا اعرفهم اساسا؟
طب لما وفاء اسلمت هل دة معناه ان خلاص بقى المسيحيين هيبتدوا يشكوا في عقيدتهم ويعملوا زيها؟
لما حجازي يتنصر يبقى خلاص يا جماعة دة المسلمين ماعندهمش ثقى في دينهم وبالتالي دة نصر مبين للمسيحية؟
دة معقووووول؟
بقت الاخبار دي فقرات محببة لبرامج التوك شو والنميمة والصفحات الاولى للجرايد المستقلة؟
ايه اللي يفيدني انا شخصيا اني اعرف قصة سيدة كانت تعيسة مع زوجها وعلشان تتخلص من حياتها غيرت ديانتها؟
ايه اللي هستفيده ان بنتين وقعوا في حب ولدين من ديانة اخرى وعلشان يتوجوا حبهم دة غيروا ديانتهم؟
ايه اللي هيعود على القارىء او المشاهد لما واحد غاوي شهرة وظهور يقرر انه يعمل فرقعة اعلامية ويدعي كذبا او صدقا انه غير ديانته؟
طب انا احسب نفسي عاقل وغير متطرف والحاجات دي لا تهز شعرة فيا......شوفوا انتم بقى في كام متعصب مسلم او مسيحي ممكن يرتكب حماقات قد ايه بسبب اخبار زي كدة بتلهب مشاعره؟
الخلاصة ان غلط واكبر غلط اننا ندي احداث واخبار زي كدة اكبر من حجمها..لأن عواقبها ممكن تكون وخيمة على الجميع

Monday, 6 August 2007

انترنت بلا حدود

وانا قاعد كدة وبأنهج من الشهر اللي فات واحداثه الكتير اللي خلتني ابتعد عن التدوين

ولسه بقول يا هـــــــــــــــــــــــــــــادي وبشوف هكتب ايه وهتصفح مدونات الناس ازاي وكل دة

تقوم بس بس مدونة الروح تقوم مدياني ومباصية ليا كدة تاج على غفلة من حيث لا ادري جه في النافوخ عدل

بس نظرا لأن التاج دة مهم ونظرا كمان لأن اللي مررت التاج دة ليا اخت عزيزة يبقى لازم يتجاوب عليه ورجلي فوق رقبتي
التاج عن
حملة انترنت بلا حدود
نخش ع الموضوع:
ما هو مدى أستخدامك للأنترنت ؟؟
مستخدم اعتيادى - ايميل - شات - العاب -
مستخدم احترافى - خدمات الوب 2 - تحميل - العاب - برامج - بودكاستس - ميديا 2
متخصص ( مصمم مواقع - مصمم جرافيك - مطور برامج - مطور مواقع - اعلامى - مبرمج - مستخدم لينكس )0
هو طبقا للتصنيفات اللي في السؤال انا ماقدرش اقول اني مستخدم اعتيادي بتصفح بس ولا مستخدم غاية في الاحترافية انما انا مستخدم محترف بيتصفح وفي نفس الوقت بيحمل وبيتعامل مع خدمات الانترنت كمان وكمان بيلعب العاب اونلاين احيانا برضة
كيف ترى هذى الحملة وما مدى تأثيرها على المستخدمين والمختصين ؟
هل تساهم بتقدمنا الحضارى والتكنلوجى ام ترجعنا للخلف؟
هل تفرض حصارا معلوماتيا على المتخصصين والطلبة والشعب ؟
هل ستؤثر سلبا على مركزنا الحضارى ( الأول:) ) فى صناعة البرمجيات وتكنلوجيا المعلومات
انا بشوف ان حملة تحديد استخدام الانترنت دي هترجعنا لورا كتير
هي في ظاهرها الرحمة وباطنها العذاب
بمعنى انها بتظهر على اساس تخفيض للاسعار علشان كل الناس تدخل الانترنت للبيوت انما انا بشوف انها هتحد بشكل كبير من انشطة المتخصصين
ما رأيك بقرار وزير الاتصالات الجديد ؟
انا بشوف ان القرار دة قرار له ابعاد سياسية ومش لوجه الله والوطن على الاطلاق
ما هى اسباب الوزير المعلنة والغير معلنة فى رأيك ؟؟؟؟
طبعا اسباب الوزير المعلنة هي تخفيض اسعار الانترنت بغرض الوصول لاكبر شريحة من الشعب تستخدم الانترنت وفي نفس الوقت القضاء على الوصلات الغير شرعية من الكافيهات
انما الاسباب الغير معلنة طبعا هي القضاء على نشطاء المدونين على الانترنت على اساس ان بعد ما تنتهي الوصلات من السيبرات والكافيهات هيبقى الاشتراك لكل الاشخاص من خلال المصرية للاتصالات عن طريق الشركات الوسيطة وبالتالي يكون من حق المصرية للاتصالات باوامر امنية طبعا فصل الخدمة عن اي بني ادم في مصر بيكتب حاجة مش على المزاج
بمعنى اخر تقنين الخدمة وبالتالي سهولة السيطرة عليها
هل تهدف الحكومة من هكذا قرار بتطبيق المبدأ العربى الشهير الا وهو فرض الوصاية على هذا الشعب القاصر ( من وجهة نظر الحكومة ؟)0
طبعا ويمكن الاجابة لى السؤال السابق توضح الاجابة على السؤال دة
كيف ستتراجع الحكومة عن قرارها ؟
بالضغوط الشعبية والتفاعل الحيوى للمتضريين من الشباب والشعب؟
بالضغوط الخارجية من منظمات الحريات العالمية ؟؟؟
بالمساهمة بتطبيق العالم قرية صغيرة ونشر توابع هذا القرار للعالم اجمع بلغات عدة ؟؟؟
بالمقاطعة الشعبية لوزارة الاتصالات وشركات الانترنت ؟ ومقاطعة التلفونات الأرضية ؟؟؟
الحكومة مش هتتراجع في قرارها على الاطلاق
لان الثقافة دي مش موجودة في مصر
وبعدين مفيش ضغط شعبي لأن مفيش شعب من الاساس
اذا كان الشعب المصري مغيب تماما عن مناقشة قضاياه الاساسية والاحتجاجات على حاجات اساسية وحرمات بتنتهك يبقى منتظرين انه يهب هبة رجل واحد ويقاوم تحديد استخدام الانترنت؟!!!!
مستحيل طبعا
وبعدين قطاعات كتيرة قوي من الشعب المصري مازالوا بيعتقدوا ان الانترنت دة رفاهية عالية جدا وترف لا يملكه الا الشباب المرفه
كيف تصف هذا الحدث ؟؟
سرقة واستغلال
سبوبة
حكم القوى على الضعيف
اذلال الشعب
عقوبة جماعية للمستخدمين نيابة عن المدونين السياسيين ؟
غير ذلك ؟؟؟
تطور طبيعي لاحداث كتير قوي حصلت وبتحصل من استغلال سياسي وتضييق وخنق للحريات وسيطرة من الدولة على كل شيء في مصر
وتطبيقا للمبدا او المثل القائل
الباب اللي يجيلك منه الريح.....سده واستريح
بس ممكن نقول ان هو فعلا عقوبة جماعية للمستخدمين نيابة عن المدونين السياسيين
هل يستحق وزير الاتصالات الائتمان على أمن مصر المعلوماتى وصناعة التكنلوجيا بمصر؟؟؟بعد ان أثبت سوء نيته و مشروعة الذى يهدف الى تدمير البنية التحتية لصناعة المعلومات فى مصر؟؟
وهو وزير الاتصالات بس اللي لا يستحق؟
ماذا تتوقع من تفاعل هذى الحملة عالميا وعربيا ومحليا ؟؟؟؟
لا اتوقع اي شيء على الاطلاق
اللي عايزاه الحكومة هو اللي هيحصل
يعني الضغوط هتكون اقوى من الضغوط للافراج عن الدكتور ايمن نور؟
سلموا امركم لله....وتكيفوا على الوضع الجديد
هل أثبتت وزارة الاتصالات والمعلومات فى مصر جهلها العملى والمعلوماتى و سوء تقديرها للظروف المحلية والدوليه ... واستغلالها للوضع المحلى ؟؟؟
طبعا ومش وزارة الاتصالات بس
دي كل مصر بتستغل كل مصر
والغريب ان الناس اصبحت بتستغل ظروف بعض والعملية بقت استغلال في استغلال
هل ترى ان نجاح الحملة يتمثل فى
اقالة الوزير الجاهل بمعايير صناعة التكنلوجيا ومواكبة التطور
التراجع عن القرار فقط
وضع نظامين تحت بند اختيارى
تراجع......مش هيحصل
انما ممكن تعديل الشروط بحيث انه يكون بشكل اختياري
ومعلوماتي بتقول ان دة هيكون اقرب للتنفيذ
ماذا ترى فى المناورة الاخيرة للحكومة تحت ضغط المرحلة الأولى من الحملة ؟؟؟؟
مناورة واضحة وكذب صريح؟؟
مناورة للحجر على العقول والافكار و تقسيم الشعب اللى طبقات تحت بند الاختيارية ؟؟
فاكرينا داقين عصافير وبنصدق الكذب بتاعهم ؟؟؟؟
حكومتنا بقى وواخدين عليها
يعني هي عادتها ولا هتشتريها؟
وبعدين هي مش فاكرانا داقين عصافير....دة هي اللي دقا لنا العصافير دي
**********************************
التاج خلص
الف شكر ليكي يا بسبس
بمرر التاج دة لكل من يدخل مدونتي ومايكونش جاوب عليه قبل كدة
بس ياريت في الكومنت يكتب انه جاوب ع التاج في المدونة بتاعته

Saturday, 4 August 2007

وحشتـــــــــــــــــــــــــــوني

وتاني تاني تاني رجعنا للمدونة تاني
مش عارف اوصف شعوري يا جماعة وانا بقرأ التعليقات اللي بتعبر عن قلقكم لغيابي عن المدونة
دي مشاعر منكم اقل ما يقال عناها انها رقيقة ومحترمة وبتخليني فعلا مش عارف اتكلم واقول ايه
طبعا الغياب كان خارج عن الارادة ولكنها شوية احداث حصلت مع بعضها واتجمعت كدة وعملت الغيبة الطويلة جدا دي
بجد اسف اني ماكنتش بتابع او ماكنتش بطمنكم عليا
بس اللي حصل اني رحت اصيف وطبعا الاجازة اجازة بدون كومبيوتر وانترنت بس كانت غلطة عمري اني اخدت الاب توب بتاعي معايا
بس الطامة الكبرى كانت اني رجعت باللاب توب ونسيت الشاحن هناك في الساحل الشمالي
فأصبح الاب توب جثة هامدة مالوش اي لزمة من غير الشاحن بتاعه طبعا
وبالتالي اصبح مجرد حديدة
وبعد ما عرفت ارجع الشاحن عبر مجموعة من الاجراءات المعقدة.....اكتشفت ان الراوتر بتاع الانترنت بااااااااااااااااااظ
وطبعا استغرق اصلاحه مجموعة برضة من التعقيدات مع ارتفاع درجة الحرارة اصبحت الجحيم بعينه
وفي نهاية المطاف وقبل ما اقول اخيــــــــــــــــــــــــــــــــــــــــــــــــــــــــــــــــــــــرا
الانترنت اتقطع من عندي لعطل في السنترال
وبعد برضة مجموعة من الاجراءات المعقدة في الجو الحر دة
رجع الانترنت
رجعت للمدونة
رجعت ليكم
وحشتووووووووووووووووووووووووووووووووووووووووووووني
انتظروني

Saturday, 30 June 2007

اوعى تقف في البلكونة

بتاع 100 مرة نناشد الانجليز ونبوس ايديهم ورجليهم يعلوا سور بلكوناتهم شوية ........ودول ودن من طين وودن من عجين
ييجي 200 مرة نقول لهم...يا جماعة المصريين مابيرتحوش في بلكوناتكم...بيقعوا منها...ودول ابدا مصممين
قعدنا نناشد المصريين المنفيين في لندن اختياريا او اجباريا انهم مايطلعوش البلكونة في لندن في شهر يونيو من كل سنة خــــــــــــــــــــــالص
بس واضح ان فيه منهم ناس مابيسمعوش الكلام...مصممين انهم يطلعوا يقفوا في بلكونة بيتهم على الرغم ان سور البلكونة قصير وممكن ياخدهم ويقع....لا وكمان ايه دول واقفين في البلكونة في شهر يونيو كمان
مش عارفين ان كدة خطر؟
عموما يستاهلوا اللي جرى لهم
عجبت لك يا زمن

Monday, 25 June 2007

مساواة


البوست اللي فات عن النظرة السلبية للفتاة المدخنة وكل التعليقات اللي عليه واللي اتهمت الموضوع انه ذكوري وفيه تحيز لبني جنسي
خدني لموضوع اكبر بيظهر في الفضائيات كل كام شهر على شكل هوجة ومهرجان كبير وهو موضوع
المساواة بين الرجل والمرأة
انا شخصيا اول ما بيتفتح الكلام في الموضوع دة في اي برنامج اكون بتفرج عليه...تلاقيني اقلب المحطة على طول
مش علشان لا سمح الله انا ضد المرأة ولا حاجة...ولا علشان انا ضد مبدأ المساواة
ابدا انا من اشد المؤيدين لحرية المرأة ومساواتها بالرجل في الحقوق والواجبات
انما مولد " ستي مساواة" بتاع كل سنة بطولة ايناس الدغيدي واقبال بركة وغيرهن على حسب التساهيل بيكون دمه تقيل قوي على قلبي لأنهن لا يمثلن المرأة المصرية الحقيقية من وجهة نظري طبعا بالأضافة الى ان كلامهن بيكون مكرر ومعاد ونظري اكتر من الازم
طب تعالوا نحسبها كويس ونفترض ان المرأة اخدت حقوقها كاملة متكاملة وبقت رئيسة ووزيرة وسفيرة وضابط واحتلت مجالس الشعب والشورى ومجلس الوزراء واشتغلت واتعينت وبقت كلمتها هي الاولى في كل شيء
وانا مش ضد كدة على فكرة...انا بشوف ان الانسان الكفء لازم ياخد حقه بصرف النظر هو رجل او امرأة
معدش في نفس دعاة تحرير المرأة اي شىء....اخدوا حقهم تالت ومتلت
طب ما تيجوا احنا بقى يا رجالة ناخد حقنا احنا كمااااااااااان
اولا..مفيش حاجة اسمها شغلانة للست وشغلانة للرجل..في مساواة في كل شيء..وزي ما العمال الرجال بيشتغلوا اي حاجة كمان العاملات السيدات هيشتغلن كل حاجة..ان شا الله يشتغلن في الفاعل
ومفيش حاجة اسمها وظيفة مناسبة للرجل ووظيفة مناسبة للست لأن دة بيتعارض مع مبدأ المساواة اللي انتم عايزينه
ثانيا...مفيش مواعيد شغل خاصة بالنساء ولو الشغل بيخلص الساعة 1 او 2 صباحا او حتى بعد كدة يبقى على الكل....مساواة بقى
ثالثا....مفيش في المواصلات العامة حاجة اسمها سيارات مخصصة للنساء على اساس بقى ان في مساواة ولو مصممين عليها يبقى في كمان سيارات للرجال
رابعا..ليه بقى الراجل ساعة الجواز هو اللي بيجيب شقة ويدفع مهر ويجهز الشقة..هو مش في مساواة..يبقى الشقة والتجهيز وخلافه بالنص
خامسا..من الاساس ليه الشاب هو اللي يتقدم اصلا للزواج...هو مش فيه مساواة..خلاص نعمل قرعة ونشوف مين اللي هيطلب يد التاني
سادسا..بلاش بقى نفقة ومصاريف والحاجات دي..ماهو بقى في مساواة بقى..الغي كل حقوق المرأة دي مالهاش لزمة
وهنقعد نقول سابعا ولحد مالانهاية...اصل الكلام في الموضوع دة لذيذ ومش بيخلص
ايتها النساء في مصر المحروسة
موضوع المساواة دة مش في مصلحتكن خالــــــــص....وانتن قريتوا بنفسكن لو حصلت مساواة كاملة هتبقى الدنيا عاملة ازاي
ايه رأيكن بقى
مساواة......ولا نمشيها زي ماهي كدة؟

Friday, 22 June 2007

نظرة سلبية


عارف كويس قوي ان الموضوع دة هيزعل بنات وسيدات للأسف عددهم اصبح كبير

وعارف كمان ان في عدد من الرجال هيزعلوا برضة بأعتبار ان زوجاتهم او والداتهم بيعملوا كدة
عارف برضة ان عدد من الشباب والبنات ممكن يقولوا عليا اني متخلف ومش مودرن وربما همجي
عارف كل دة بس مضطر اني اقول اللي في نفسي
انا لا احترم على الاطلاق المرأة المدخنة
ايا كانت بقى المرأة دي ايه
سواء بقى كانت بنت او ست كبيرة....بتسقط من نظري فوراااااا
سامع حد بيقول لي اشمعنى كدة....ايه علاقة التدخين بالأخلاق والاحترام؟
مفيش علاقة مباشرة بين التدخين وفساد اخلاق البنت....انما بدون سبب حقيقي اول ما عيني بتلمح فتاة او سيدة بتدخن بأحس على طول بمشاعر سلبية تجاهها
ممكن جدا وبتحصل ان تكون الفتاة او السيدة المدخنة لابسة ملابس في غاية الاحترام ومحجبة كمان انما منظرها وهي ماسكة السيجارة وبتدخنها منظر في منتهى السوء بالنسبة لي على الأقل.
بس على فكرة
مش انا لوحدي اللي بحمل المشاعر السلبية دي تجاه الفتيات والسيدات المدخنات انما عدد كبير جدا ربما يكون اغلبية الشباب لا يحترموا البنت او السيدة المدخنة
على الرغم ان
منظر المرأة المدخنة انتشر بشدة في القاهرة وخاصة في المولات والكافيهات بس مش عارف دة من ايه؟
ايه اسباب تزايد اعداد السيدات المدخنات؟
هل للوسط الفني المعروف انتشار السلوكيات دي فيه علاقة بتزايد اعداد المدخنات؟
ولا دي من مظاهر المساواة بين الرجل والمرأة؟
بس يبقى نصيحة مهمة اقولها لأي فتاة او سيدة بتدخن
نظرتنا كشباب و رجال تجاهكم فعلا لو عرفتوها مش هتكونوا مبسوطين على الأطلاق
معلش انا أسف لو اي مدخنة استفزها الموضوع دة
...بس يبقى كويس برضة لو شرحت لنا وجهة نظرها.....يمكن اكون انا اللي تفكيري متخلف اكتر من اللازم

Sunday, 17 June 2007

حماد وفتحي

حماد وفتحي أخين شقيقين....والدهم توفى وترك لهم تركة عبارة عن مصنع....وكان من وصايا الأب قبل ما يتوفاه الله ان العمال يختاروا واحد من الأخين يدير المصنع
اختار العمال حماد على اساس انه متدين وذمته كويسة وقريب من العمال ومتابع لمشاكلهم وبيحاول يحلها لهم.....انما فتحي طول عمره ذمته واسعة وبعيد عن العمال وعلاقاته حلوة جدا بالموردين والعملاء بتوع المصنع على حساب العمال
فتحي طبعا جن جنونه....السبوبة اللي بيقلبها من المصنع هتضيع عليه وهو عارف ان حماد راجل متدين وذمته نضيفة فبالتالي هيقطع عليه مية ونور
طب يعمل ايه فتحي بيه؟
نشفها ع المصنع تماما وحرض المتعاملين مع المصنع على عدم التعامل مع المصنع طول ما حماد هو اللي بيديره وتسبب في توقف الانتاج وعدم قبض العمال لرواتبهم كل دة علشان يحرج حماد ويثبت انه فاشل في ادارة المصنع
مش كدة وبس لا دة تعمد افتعال المشاكل مع حماد وبعت بلطجية يتدربوا على العنف علشان يستخدمه ضد حماد والعمال اللي بيحبوه
حماد فاض بيه واتخانق مع فتحي خناقة لرب السما دفاعا عن نفسه وعن المصنع وعن العمال كان فيها ضحايا من الجانبين
الغريب بقى ان جيرانهم وقرايبهم وكل اللي يعرفوهم بيقولوا ان الاتنين غلطانين وان دة صراع على السلطة والنفوذ في حين اي حد منصف هيعرف على طول مين اللي غلطان.....مين اللي مارضيش باختيار الناس للي يحكمهم؟
مين اللي تحالف مع الغير ضد اخوه شقيقه؟
مين اللي كان مصمم على انه يثبت ان اخوه فاشل؟
مين اللي كان مصمم على انه يجوع الناس كلها في سبيل تحقيق غرضه؟
مين الغلطان؟
فتحي ولا حماد؟
قصدي.............
فتح ولا حماس؟


ملحوظة:
انا راجل مصري مش فلسطيني....يعني مش فارقة معايا فتح ولا حماس على الاطلاق....وكمان انا رجل ليبرالي...لا انتمي لأي تيار سياسي معين سواء الاخوان المسلمين او غيرهم وان كنت لا انكر اني احترمهم كتيار منظم وله قاعدته الجماهيرية العريضة
فقط هي رؤية بني ادم محايد مالوش مصلحة مع دة ولا دة

fb comments

wibiya widget

LinkWithin

Related Posts with Thumbnails